Nongpoh, Lber 19: Ban pynsuk ia ki rukom ai jinghikai kiba ia dei bad ka jingpule ia ka saian khamtam ia ki met bneng kiba don ha ka hawhaw, na ka liang ka Bharti Airtel Foundation ka ka la seng syndon da ka Astronomy Club hapoh ka Grace Foundation Sec. School, Lumsohpieng kaba dei ruh ka sien kaba nyngkong eh ban don kum kane ka Club hapoh ka jylla Meghalaya.
Ia kane ka Astronomy Club la pynlait paidbah ha ka 18 tarik Lber 2025, da ka Kong E. Synrem BMC Bhoirymbong Block kum ka kongsan, la ia donlang ruh u Rahul Chatterjee, Space Science Experts, u Bah Isynei Hinge MDC Umroi Constituency, Bah Manbha Khonglah Project Coordinator Bharti Airtel Foundation, Kong Oltricia Warjri Administrator ka Grace Foundation Sec. School Lumsohpieng lem bad kiwei kiwei ki Nonghikai ki kmie ki kpa bad ki khynnah skul.
Ha kane ka jingpynlait paidbah ia katei ka club kaban ai jinghikai shaphang ki jingpule hawhaw bad ki met bneng, na ka liang ka Bharti Airtel Foundation haka jingiatreilang bad ka Shillong Science Center NEHU, ki la aiti ïa ka Kor khmieh Met Bneng “Telescope” sha katei ka Club, kaba la pynmuja shikatdei eh ia ki khynnah skul jong ka Grace Foundation Sec School bad kiwei kiwei ki skul ba marjan ban ioh bynta ban peit dala ki khmat ia ki met bneng bapher bapher.
Haba kren ha kane ka sngi, ka Kong Oltricia Warjri ka la ai khublei kyrpang ia ka Bharti Airtel Foundation kaba la shim ia ka sienjam ban seng ia ka Astronomy Club ha kane ka shlem ai jinghikai kaba pynsuk shikatdei eh ia ki nonghikai ban phriang ia ki jinghikai ha kaba ia dei bad ka hawhaw kumjuh shaphang ki met bneng bapher bapher kaban pynmyntoi pat ia ki khynnah skul da kaba pynshlur ia ki khynnah pule jong ka thaiñ Bhoirymbong ban wan iasnohktilang bad kane ka club.
Na ka liang ka Bharti Airtel Foundation, ka la pynbna ba kum ka foundation kaba la kynjoh mynta sha ka 25 snem ka jingshakri paidbah ka don ia ka jingthrang ban thaw ia kum kane ka club sa ha ki 5 tylli ki skul ha Ri Bhoi District ban pynshlur ia ki samla pule ban wad jingstad shaphang ki met bneng, ka science nalor kiwei kiwei ki lad jingpule.
