Nongpoh, Ïaiong 05: Ka Raid Nonglyngdoh ba hap ha ka Nongpoh Sirdarship kan sa pynlong biang ïa ka Shad Sajer ha ka khlaw kyntang kaba don ha Mawjong, kaba la dei ka sien kaba 17, kaba long shi bynta ban pynneh pynsah ïa ki riti ki dustur katei ka Raid.
Kumba la ïathuh da u Lyngdoh ka Raid Nonglyngdoh, u Sensy Lyngdoh bad u Pator ka Kur Nongshli, u Bah Liander Nongshli, ki la pyntip ba kane ka Shad Sajer kan long ha ka 12 tarik u Ïaiong 2025 ha katei ka khlaw kyntang ka Raid, kaba dei kawei na ka khlaw kaba la pynneh pynsah bad kaba la ri la sumar da ka Raid.
Ki la ïathuh ruh ha katei ka sngi, ki don shibun ki jingleh niam bad ki jingshad tynrai ryngkat ka rwai ka siaw bad ka put ka tem ban pynim ïa ki rukom leh tynrai kiba la ïalam naduh ki longshuwa ki man shwa. Ki la khot la wer ruh ïa ki khun ki hajar ban ïa poi ha katei ka snig bad kynthup ruh ïa baroh ki paidbah ka Raid, District bad ka jylla hi baroh kawei.
