Rung 4 ngut ki samla pule na Ri Bhoi ha ka thup ka Top-20 ka Result SSLC examination

Nongpoh, Ïaiong 5: Ka long ka khubor jong ka jingsngewkmen bad ka jingai mynsiem ruh ia kiwei ruh ki khun samla ka them Ri Bhoi, ha kaba ha kane ka kynti hadien ba ka Meghalaya Board of School Education (MBOSE) ka la pynbna ïa ka result jong ka SSLC examination 2025, haduh 4 ngut ki samla na Ri Bhoi ki la ioh ban rung sha ka thup jong ka top-20 lane kum kita ki topper kiba wan shakhmat eh ha kane SSLC examination 2025.

Kumba la pynbna ha kane ka result jong ka SSLC examination 2025, ka Ri Bhoi District ka la poi haduh 89.33% kiba la pass ha kane ka examination bad napdeng ki samla kiba ïa khun ha kane ka SSLC examination 4 ngut ki la ioh ban rung ha ka thup jong ka top-20.

Kitei ki samla ba la ioh rung ha ka thup jong ka Top-20 ki kynthup ïa u Sourav Pandey  na Alpha English Higher Secondary School, Nongpoh, uba la ioh rung ha ha ka 3^rd position jon ka top-20 da kaba u la ioh ban khur ïa ki mark haduh 576 marks, ryngkat ka distinction ha ka subject English, Mathematics, Science & Technology, Social Science, Computer Science, bad Hindi.

Ka Nandini Kumari na ka skul Alpha English Higher Secondary School, ka la ioh rung ha ka 6^th position jong ka top -20 da kaba ka la ioh 569 marks bad ka la ioh khur ruh ïa ka distinction bad letter ha ka subject English, Mathematics, Science & Technology, Social Science, Health & Physical Education, bad ka Hindi. Ka Queency Kharsohnoh na ka Umroi Presbyterian Higher Secondary School, Umroi, ka la ioh rung ha ka 7^th Position da kaba ioh khur haduh 568 marks bad ruh ka Samla Ineshabakor Nongrum na Nehru Memorial Secondary School, Umsning, ka la ioh rung ha ka 17^th Position da kaba ioh khur 561 marks.

Wat la ym ioh ban ïa kren ïa baroh kine ki samla ba la wan rah nam wan rah burom, ka la long ka jingkmen ym tang ïa ki bad ka jingkmen ka dei naduh ki nonghikai, ki kmie ki kpa kiba la pynpaw ïa ka jingkmen ha ba don kum kine ki samla kiba pynleit jingmut shisha ha ki jingpule bad na naduh ki nonghikai, ki kmie ki kpa ki la ai ïa la ka jingkyrkhu ïa ki khun ba kin dangiew shaphrang ha baroh ki liang khamtam ban poi sha ka kyrdan kaba shaneng kaba long ka burom ïa ka ing ka sem bad ka imlang ka sahlang.