Shillong, Iaiong 05: Kawei na ka tamasa lane ka jingshad tynrai ka jaid bynriew Khasi kaba la paw bha ha ka jylla ka la sdang mynta ka sngi bad kane ka tamasa ka dei ka ‘Shad Suk Mynsiem’ ba la ju pynlong man u snem da ka Seng Khasi Seng Kmie ha Madan Weiking, Jaiaw, Shillong.
Kane ka tamasa Shad Suk mynsiem ka dei kawei na ka tamasa kaba ki rakhe na ka bynta ban wan rah ia ka jingsuk, ka jingainguh bad ka jingiatylli bad ka dei ruh ka tamasa hadien ba la dep lum dep lang ia ki kam rep kam riang bad ruh ka jingpyni sha ka pyrthei ba ka jaid bynriew Khasi ka long kaba riewspah ha ki rukom leh tynrai.
Kane ka shad suk mynsiem la sdang da ka jingiaid paidbah lyngba ka jingshad tynrai kaba la sdang na ka Iingseng ha Mawkhar bad pynkut ha Madan Weiking, Jaiaw Shillong. Hadien ba la poi ha katei ka jaka leh niam ne shad tynrai la pynlong ruh ia ka nguh ka dem Blei da u tymmen u san ba la shim bynta da ki riew tymmen ki riewsan ba ki khot ki pan na ka bynta ka jingkyrkhu bad ka jingsuk jingsain jong ka jaid bynriew.
Ia kane ka jingsdang ia kane ka shad suk mynsiem la kaweh lama da u Rgh. Wallamphang Roy, uba dei u Adviser ka Seng Khasi Kmie.
Ha kane ka sngi sdang ka Shad Suk mynsiem lane kaba ki khot ka sngi Noh Kjat la iohi ba haduh 307 ngut ki samla kynthei bad shynrang ki la shim bynta ha ka riam tynrai kaba phuh ba phieng bad ki la shim bynta ha kane ka jingleh kmen da ka mynsiem jong ka jingsuk bad jingkmen. Kane ka shad suk mynsiem ka pyni ia kata ka jingkhraw ne paw ha ka jingshad tynrai ban wan rah ia ka suk ka sain bad la iohi ne sakhi ruh ia kata ka mynsiem ba ki don ban wan rah ia kata ka jingiatylli hapdeng ki jaid bynriew Khasi.
Shuh shuh, ha kane ka sngi, sdang ka shad suk mynsiem la khmih lynti ruh ba ha kane ka lympung kaba kin dang bteng ban pyndep ia kane ka shad suk mynsiem kin wan poi shibun ki paidbah na ka jylla bad nabar ka jylla ba kin sakhi ia kata ka jingriewsphah ka jaid bynriew Khasi ha ka jingpynneh pynsah ia la ka tynrai.
