Nongpoh, Iaïong 08: Hadien 10 snem ba ka Skul Ms. A.W Thomas Secondary School Umlangpur Kiling kaba don ha Ri Bhoi District ka la pynmih ia ki samla pule ban ia khun ia ka eksamin SSLC bad mynta u snem 2025 ka la long shisha ka jingkmen bad ka burom ia kane ka skul ha kaba ki khynnah ba iakhun ia ka SSLC examination ki pass lut na katei ka skul bad ki don ruh ki khynnah kiba la wan bha shakhmat bad kiba duna sa tang khyndait ban ioh rung ha ka Top-20 jong ka SSLC examination.
Kumba la pyntip da ki bor pyniaid skul, kane ka skul ka phah 16 ngut ki samla kiba ia khun ia kane ka SSLC examination 2025 bad baroh 16 ngut ki pass bha lait noh tang uwei uba ioh ia ka simple pass.
Ka jingpass bha ki khynah na kane ka skul ka la pynlong ia ka Managing Committee ban pynkup burom ia ki, namar ki don ki khynnah kiba wan ha ka kyrdan 1st bad 2nd division bad ki don ruh ki khynnah kiba la jan ioh rung ha ka thup jong ka Top-20 bad kaba pynsngewsarong ruh ka long ba bun ki khynnah ki ioh letter ha ki subject bapher bapher kata haduh 4 bad 5 tylli ki ioh ia ka letter marks.
Naka liang ka Headmistress, ka Miss Onita Sad ka la pynkup burom ruh ia kawei ka khynnah ka Samla Felisha Bandara kaba la wan ha ka kyrdan ba nyngkong ha ryngkat 5 tylli ki letter.
U President ka Managing Committee kane ka skul, u Tbn. S.Sylhe bad ki nonghikai ki la pynpaw shisha ka jingsngewkmen haba ki iohi ba ki khynnah jong ki, ki wanrah ia u soh ka jingjop ia kane ka skul, namar kane ka skul ka don sha kyndong bad ha ka thain khappud bad ym pat ju don mano mano ba tip shaphang jong kane ka skul ba ki khynnah ki la wan rah nam wan rah burom.
Shuh shuh, ki la pynpaw ruh ba kane ka skul ka la paw shakhmat ka dei da ka jingminit bad ka jingtrei shitom ki khynnah ka la pynkmen shisha ia ki bad ki khmih lynti ruh ba ha ki snem ban sa wan kin sa don ki khynnah ki ban ioh rung ha ka thup jong ka Top-20 ka SSLC examination ba la pynlong da ka MBOSE.
