Nongpoh, Iaiong 09: Uwei u nongniah kali kamai na ka jylla Meghalaya bad uba la tip kyrteng kum u Bah Iajerlang Mylliem Umlong, uba la niah kali kamai na Shillong sha Guwahati, u la shah shoh bad shah ktah kti ha ka kynhun ki nongniah kali na ka jylla Assam, ha kaba katei ka jingjia, ka la jia mynshisngi ha Khanapara kaba don ha ka liang jong ka jylla Assam.
Halor katei ka jingjia bad ban ym wanrah ia ka jingiakynad ne jingiasngewpher hapdeng ki nongniah kali kamai na ka jylla Assam bad Meghalaya, ki la pynlong ia ka jingialang kaba kyrkieh ha phyllaw ka ophis u DTO Nongpoh, na bynta ban iakren halor katei ka kam bad ban nym jia shuh kaba kum katei ka jingjia ne ban mih ki jingiakulmar hapdeng ki nongniah kali, kata hapdeng ki nongniah kali na Meghalaya bad Assam, hynrei ki dei ban don kata ka jingiatreilang bad burom kaba markylliang hapdeng ki para nongniah kali kamai.
Ia ka kynhun ki nongniah kali na Meghalaya la mihkhmat da ka All Khasi Meghalaya Tourist & Taxi Association, katba ia ka jylla Assam la wan ban mihkhmat da ka All India Goods Transport Worker Association, ha kaba lyngba katei ka jingiakynduh, ka jingiakren ka la poi sha ka jingiakren kaba sngewthuh jingmut.
Ia ka All khasi Meghalaya Tourist & Taxi Association, la wan ban mihkhmat da u Bah Ricaldinus Dohling, kum u nongialam ha katei ka sngi, katba na ka Jylla Assam, la wan ban mihkhmat da u Biren Sharma, uba dei u General Secretary Assam State, All india Good Transport Worker Federation.
Ha ka jingiakren halor katei ka jingjia shah ktah kti jong uwei u Draibar, ka jingiakren ka la poi sha kaba iasngewthuh jingmut bad kiba la rai ban don ka jingiatreilang, ha kaba lada jia ei ei ia u nongniah kali na Assam ha Meghalaya, dei ki nongniah kali na Meghalaya ki ban shimkhia ia kata ka kam bad kan long ruh kumjuh ba lada jia eiei ia ki nongniah kali Khasi ha Assam, dei ki nongniah kali na Assam ki ban iada ia ki nongniah kali Khasi.
