Nongpoh, Iaiong 09: Ka la long ka jingkmen kaba khraw eh ia ki nongialam ka Hima Nongkhlaw, kata naduh u Syiem, ki Myntri lem bad kiwei kiba don bynta hapoh ka Hima Nongkhlaw bad kata ka dei ba hynnin ka sngi, u Bah Sosthenes Sohtun, u la leit ban plie paidbah noh ia ka ophis jong ka Hima Nongkhlaw, Patharkhmah Branch.
Haba plie ia katei ka ophis ka Hima Nongkhlaw Patharkhmah Branch, nalor ka jingdon u MLA Jirang, la sakhi ruh da ka jingdon u Pai’em Phrester Manik Syiemlieh, Syiem ka Hima Nongkhlaw, u Dr. Kestonbel Manik Syiemlieh, Dy. Syiem Hima Mylliem, nangta u Pai’em H. Wahlang, Syiem ka Hima Jirang, ki Myntri lem, ki Sordar shnong ka thain Western Ri Bhoi bad na Hima Nongkhlaw ruh kumjuh.
Ia katei ka ophis treikam ka Hima Nongkhlaw, Patharkhmah Branch, la tei ia ka ha ka jinglut kaba T. 8 Lak tam, ha kaba la tei ia ka lyngba ka jingpynmamg pisa na ak Chief Ministers Special Rural Development Fund (CMSRDF).
Haba iadei bad katei ka jingioh ia katei ka ophis ba thymmai ka Hima Nongkhlaw, Patharkhmah Branch, na ka liang ki nongialam ka Hima Nongkhlaw, kaba kynthup naduh u Syiem lem bad ki Myntri, ki la sngewnguh eh halor ka jinglah u MLA Jirang ban pynioh ia katei ka ophis treikam kaba pura bad kaba la pynsuk eh ha ka rukom treikam ka Hima Nongkhlaw ha ka thain ki shnong ka thain Patharkhmah bad kiba dang hap hapoh ka Hima Nongkhlaw.
Katba na ka liang u Bah Sosthenes Sohtun, kum u MLA, u la pynpaw ia ka jingsngewkmen kaba khraw eh ba u la lah ban pynurlong ban pynioh ia katei ka ophis ka Hima Nongkhlaw, Patharkhmah Branch, khnang ban pynsuk ia ka rukom treikam ka Hima Nongkhlaw. Ha kajuh ruh ka por, u la ai ruh ka jingiaroh ia ka sorkar, kaba la pynsngew pynsngap halor ka jingkwah jong u ban pynulong ne ban pynioh ia katei ka ophis treikam ka Hima Nongkhlaw, Patharkhmah Branch.
