Nongpoh, Iaiong 11: Kum kawei na ki skul kaba la pawnam ha ka thain ka Don Bosco Higher Secondary School, Byrnihat bad kaba la don bynta eh ha ka ban kyntiew ia ka pule puthi ha katei ka thain, hynrei kaba sngewtynnad ia katei ka skul, ka long ba mynta ka la lah syndon ban buh sa ia ka jaka ban ai jinghikai ha ka tem ka put.
Ha katei ka sngi, ba la plie paidbah ia katei ka kynhun tem ne ka Band hapoh katei ka skul, ka la don ruh ka prokram ban ai khublei khadduh ia u Fr. Kmenlang Nongrum, uba u Principal jong katei ka skul bad uba la mih noh mynta na katei ka skul, kaba u la shakri ha kine ki snem kiba la leit noh baroh.
Haba plie ia katei ka jaka ai ai jinghikai tem hapoh katei ka skul, la sakhi da ka jingdon u Bah Sosthenes Sohtun, MLA Jirang kum u Kongsan, nangta kiwei Phadar, ki Sister, ki nonghikai lem bad ki riew rangbah jong ka thain Byrnihat.
U Bah Sosthenes Sohtun, haba u ai jingkren ha katei ka sngi, u la sngewkmen eh ba katei ka skul, ka la lah ban buh ia katei ka jaka ban ai jinghikai tem ia ki khynnah, kiba kwah bad sngewtynnad ban iashimbynta ha ka kam put kam tem bad khamtam eh ba katei ka skul, ba ka la dei kawei na ki skul, kaba la sei ia shibun ki khynnah kiba la lah ban pule ha ki kyrdan ba heh bad kaba la dei ruh kawei na ki skul, kaba la kyntiew ia ka pule puthi ha ka thain Byrnihat.
Lyngba jong katei ka sngi, ba u Bah Sosthenes Sohtun, u la leit ban iashimbynta ha katei ka sngi lehkmen jong katei ka skul, u la lah ruh ban nohsynniang da ka song pisa sha katei ka skul, khnang ba kin nanglah ban pyniaid ia ka skul bad khamtam eh haba iadei bad katei ka jaka ban ai jinghikai tem ia ki khynnah skul.
