Nongpoh, Iaiong 18: Ban wan rah ia ka jingiatylli bad ban tehsong ia ka kur Mallai ha Ri Bhoi District, ka Seng Kur Malai Ri Bhoi District mynta ka sngi ka la pynlong da ka jingiakynduh kaba nyngkong eh ba la pynlong ha Maryland Resort Umsawnongkharai ha Ri Boi District.
U MLA ka South Shillong U Bah Sanbor Shullai u la wan ban shim bynta kum u kongsan bad la don ryngkat naduh u Adviser ka Seng Kur Mallai Ri Bhoi u Bah Thomas Mallai, u President ka seng kur u Bah S. Malai, ka Kong B. Mallai kum ka longkmie bad kynthup naduh ki nongialam kur bad ki longing na ka kur Mallai na kylleng ka dong Ri Bhoi. Ia ka jingialang la pyniaid da u Bah Kerbok Mallai, Secretary ka Seng Kur Mallai Ri Bhoi District.
Ha kane ka sngi, ka seng Kur Mallai ka la pynkup burom ruh ia ki dkhot jong ka kur Mallai kiba la paw ha ki kyrdan bapher bapher naduh kiba long engineer, ki nonghikai, ki samla pule bad kiwei kiwei kiba la paw ha ka kam shakri paidbah bad ha ki kyrdan bapher bapher.
Kumba la pynpaw ha ka jingkren da ki nongialam ka Kur Malai kata naduh u Bah Thomas Roy Mallai, u Bah Arland Mallai, u Bah Serephim Mallai bad ka Kong B. Mallai, ka jingthmu jong kane ka jingialang ka long ban ia kren halor ki kam jong ka kur na ka bynta ban tehsong bad ban wan rah ia ka jingiatylli na ka bynta ban kyntiew ia ka long briew ka man briew bad ka kamram jong ki Kñi bad ki Longkmie ha kaba kyntiew ia ka longkur ka long jaid.
Na ka liang u Bah Sanbor Shullai, haba kren ha kane ka sngi u la ai khublei kyrpang ia ki nongialam ka kur Mallai bad ia baroh ki kur Mallai na Ri Bhoi, ha kaba ki la shim ia kane ka sienjam ban pynlum pynlang ia ka kur bad dei ha kum kane ka lympung ki lah ban ia kren ia ka eh ka shon bad ka bha ka miat jong ka kur hi baroh kawei.
U la ong ruh kum ka kur hi baroh kawei ki hap ban don ka jingiatrei lang khlem da don kano kano ka jingleh shiliang hapoh ka kur bad lada don hi kata ka mynsiem jong ka jingiatrei lang, ka long kaba suk ban kyntiew ia ka bha ka miat jong ka kur hi baroh kawei.
Shuh shuh, kaba kham ai mynsiem ia ki kur Mallai na Ri Bhoi, ka dei ka jingpynshlur jong u ban pynmih ruh wat ia kita ki MDC ne ki MLA na ka kur Mallai, namar lada mih kita ki kur kiba paw na ka kur ka jingsarong kam dei tang ia ka kur bad ka jingsarong ia ka jaid bynriew hi baroh kawei, ha kaba ka jaid bynriew jongngi ka dang donkam shibun ki riew khraw kiba lah ban ai ia ka jingshakri na ka bynta ban kyntiew ia ka jaid bynriew hi baroh kawei.
