Nongpoh, Ïaïong 21: Na ka jingkylla kynsan kawei ka trok mynta ka janmiet, uwei u Dribar u la mynsaw jur bad u la sahkut syndon shapoh ka trok haduh ba um lait shuh ban mih shabar, ba katei ka trok ka la kylla sha ka Nala bad la shah ban ha u Dewbilat ba la kit da katei ka trok.
Kane ka jingjia ka la jia mynta ka janmiet ha ka por 5.40 baje mynta janmiet ba katei ka trok ka dang hiar na Shillong ban leit sha Guwhati, hynrei kynsan kynsan ka la leit tynrah sha ka nala bad ka la kylla syndon haduh ba la shah bhen ha u Dewbilatbad katei ka trok ka la julor syndon.
Kane ka trok kaba la kylla bad kaba la jot phum syndon ka dei kaba don ia u number UP-65-CT-6180 bad ia ka kyrteng u Dirbar ym shym pat la ioh lum kyrteng ba u dang sahkut shapoh ka trok.
Halor kane ka jingjia, ki Pulit na Nongpoh ki la hiar mardor ban iarap bad ban sei ia utei u dribar, ha kaba ka la shim por da ki kynta ban sei, na ka daw ba ka la liat sha Nala ha ka jingkit khia ia u dewbilat.
Kumba la iathuh, la ong ba kane ka jingkylla katei ka trok ka lah ban dei na ka jingpynher sted palat ia ka kali, kaba u dribar um lah shuh ban tehlakam ia ka Kali.
Kumba long haduh mynta, ki Pulit ki dang iakhun tyngeh ban ioh sei ia u dribar ba la sahkut hapoh ka trok bad namar ka jingban u dewbilat ki la hap ban weng shuwa ia u dewbilat ban ioh sei ia utei u dribar ba la sahkut shapoh ka trok bad ba la suba ba u la mynsaw na ki bynta jong ka kjat, kaba la shah ban hapoh ka kali.
