Nongpoh, Ïaïong 22: Ban don ka jingïatrei lang na ka bynta ban wan rah ïa ka shongsuk ka shongsain bad ka bha ka miat sha ki shnong ki thaw, ka tnad Pulit na Ri Bhoi mynta ka sngi ka la pynlong da ka jingïalang ha Pilangkata Police Outpost kaba long ka jingïakynduh lang hapdeng ki bor pulit, ki rangbah shnong, ki Secretary Shnong bad ki paidbah.
Ïa kane ka jingïalang ba la pynlong ha Pilangkata Police Outpsot la lamkhmat da u Bah S. Khymdeit uba dei u Officer In-charge ka Pilangkata Police Outpost ban ai ka jinghikai sha ki nongïalam shnong bad ki paidbah.
Ha kane ka jingïalang ne ka jingïakynduh hapdeng ki nongïalam shnong bad ki bor Pulit ka Pilangkata la kham ban khia halor ka jingdonkam ban don noh kata ka Village Defence Party (VDP) bad kata ka Community Liaison Group (CLG), kiba dei ki kynhun mon sngewbha ban ïa trei lang bad ki bor pulit na ka bynta ban peit ïa ka bha ka miat bad ka shongsuk ka shongsain ki paidbah.
Ha kane ka jingïalang la sam ruh ïa ki Application Form jong ka VDP da ka ophis u Officer In-charge ka Pilangkata Police Outpost sha ki Nongïalam shnong ba ki hap ban phah sha ka ophis na ka bynta ban thung ïa ki President, Secretary, ki member jong ka VDP ba la ai por haduh ka 10 tarik u Jymmang 2025.
Kumba la pynpaw ruh da u Senior Superintendent of Police, u V.S Rathore, la ong ba kum kane ka jingïalang ka tnad pulit na Ri Bhoi kan dang pynlong ha ki sngi ban sa wan.
U la pynpaw ruh da kaba ong ba ka jingthmu jong kine ki jingïalang ka long ban thung noh ïa kita ki VDP bad ki CLG ha man la ki shnong ha Ri Bhoi bad la kumno kumno kumno ïa ki VDP yn thung noh shuwa ka 30 tarik u Jylliew 2025 ha man la ki shnong.
Shuh shuh, une u Heh Pulit ka Ri Bhoi, u la ong ruh ba u khmih lynti ba da ka jingdon kane ka kynhun VDP ne CLG ha man la ki shnong ha Ri Bhoi, kan don ka jingïatrei lang hapdeng ki Pulit bad ki paidbah na ka bynta ban ïa khun pyrshah ïa ki kam sniew kum ka jingkynrei u drok, ki kam tuh kali, ka POCSO act bad kiwei kiwei ki kam sniew kiba ktah ïa ka shongsuk ka shongsain ki paidbah ha man la ki shnong.
