Nongpoh, Ïaïong 22: Ki paidbah nongshong shnong ka Shnong Umtasasor Mawdakhar ha Ri Bhoi District mynta ka sngi ki la leit tur syndon sha ka ophis u Assistant Executive Engineer ka Nongpoh Rural Distribution Sub Division, MePDCL, Nongpoh na ka bynta ban ujor halor ka jingkiew palat ka bai bording ilektrik.
Kane ka jingleit tur ne ujor syndon halor kane ka jingkiew ka bai bording ilektrik ha katei ka shnong, ka dei hadien ba ki paidbah ki la bitar bad kim sngew ïahap shuh ïa kata ka jingkiew ka bill jong ka bai bording ilektrik ha kitei ka shnong.
Kumba la pynpaw ha kane ka sngi, ki don haduh 30 tylli ki tnumïing kiba mad ïa kane ka jingshah ktah na ka jingkiew palat ka bill jong ka bai bording ilektrik ha katei ka shnong Umtasor Mawdakhar.
Kane ka jingïakynduh ïa u Engineer ka long ruh ba kitei ki Longïng ki kwah ba pan jingshai halor kane ka jingkiew palat ka bill jong ka bai bording ha ki ing ki sem jong ki.
Haba kren sha ki lad pathai khubor, ka Kong Felita Muruh bad u Bah Victor Dkhar, ki la ong ba kum ki longïing ba shah ktah ki pynpaw shisha ïa ka jingsngewkhia na ka jingkiew kynsan ka bill jong ka bai bording ilektrik ha katei ka shnong.
Ki la ong ruh dei namar ba la kiew palat ka bill jong ka bai bording ilektrik, ka la pynlong ruh ïa ki ban wan tur sha kane ka ophis treikam na ka bynta ban pan jingshai na u Engineer, namar tang hapoh ka shi bnai ka bill ka la kot sha ka 16 bad 17 hajar bad lada ka long ha kane ka rukom kim kot bor shuh ban siew.
Ki la ïathuh ruh kane ka jingkiew ka dor jong ka bai bording haduh 16 ne 17 hajar ka dei tang hapoh ka 74 sngi bad dei namar kane ka daw ki hap ban pan jingshai. Ki la ïathuh ruh ba shen kin sa leit ruh ban ujor sha ki bor kiba kham halor, namar lada ka long ha kane ka rukom kin nym lah shuh ban siew ïa ka bill ba ki don ka jingkitkhlieh ban bsa ïa ki khun ki kti, ban phah skul bad kiwei kiwei ki jingdonkam ba kum ka sorkar ka hap ban pyrkhat bad ka dei ruh ban pynthikna ba ka bill ka dei ban poi man la u bnai bad ba kam dei ban long kumne ba ka jingkiew ka bill ka la pynlyngngoh shisha ïa ki.
