Shillong, Jymmang 13: Ka kynhun ialehkai Cricket ka Meghalaya ka la ioh ban rung noh sha ka thup jong ka phainal ha ka 3rd NECDC Senior Men’s Interstate Friendship Tournament 2025 kaba la long ha Nagaland, kaba dei ruh hadien ba ka la pynrem noh ia ka kynhun ialehkai ka Arunachal Pradesh da 7wicket.
Ia kane ka lympung ialehkai jong ka 3rd NECDC Senior Men’s Interstate Friendship Tournament 2025 la pynlong da ka Nagaland Cricket Association hapoh ka jingkhmieh jong ka North East Cricket Development Council na bynta ban pynkhreh ia ki lympung ialehkai kriket kiban sa pynlong da ka BCCI jong u snem 2025-26.
Ha ka jingiakhun ia ka semi final, ka kynhun ialehkai jong ka Arunachal Pradesh ka la jop ia ka toss bad kam trai ban tied nyngkong, hynrei da ka jingtbit ki rang kawang ball ka Meghalaya, ka Arunachal ka la ioh ban tied tang 101 run hapoh ki 33.1 over.
Haba wan ban tied bad ban beh ia katei ka thong ba la buh da ka Arunachal, ka kynhun jong ka Meghalaya ka la lah ban tam ia katei ka run ba la buh tang hapoh ka 19.3 over.
Lah ban kdew, ba ha ki lympung ialehkai kriket kiba la dep, ka Meghalaya kam shem la ioh ban rung sha ka final tang na ka daw ka jingshah pynthut ki bor ka mariang.
Ha ka jingiakhun ia ka semi final kaba mynta ka sngi, ki lai ngut ki rang kawang ball ka Meghalaya kiba la lah ban lehkai bha ban pynjop bad pynioh rung ia la ka kynhun sha ka final, ki kynthup ia u Manish Sharma, u Ram Gurung bad u Aryan Borah, Manish u la ioh ban khyrwit 4/2 hapoh ki 5.1 overs, u Ram u la ioh ban khyrwit 3/21 ha ki 7 over bad u Aryan u la khyrwit 3/28 hapoh ki 10 over.
Na ka liang ka Arunachal’s u ba la kamai run bun tam u dei u Neelam Obi u ba dei ruh u kapten ka kynhun u ba la kamai 28 run, watla ka Arunachal ka la kot sha ki 50 run bad hap noh tang 1 wiket hynrei da ka jinglah ban ialehkai bha da ki nongap fielding bad ki nongkawang ball ka Meghalaya ki la lah ban pynjem knap noh ia ka Arunachal.
Na ka liang ka Meghalaya u Arpit Bhatewara u lah ban tied bha da kaba kamai 49 run na ki 39 ball ha ryngkat u Arien Bonchang Sangma u ba la kamai 22 na ki 30 ball, kawei ka 4 bad 2 tylli ki six bad ban kamai run shiparalok haduh 56 run, u Nishanta Chakraborty u la tied 16 run khlem out bad u Lerry G Sangma 1 run khlem out. U kapten ka Meghalaya u Kishan Lyngdoh u la tied 13 run na 21 run.
Ha ka thup ialehkai jong ka final, ka Meghalaya kan ia kynduh markhmat bad ka Nagaland kaba dei ruh ka lahduh ha ki ar wat jong kane ka lympung ialehkai kriket, ha kaba ka Nagaland ka la lah ban pynliem noh ia ka Manipur da 4 wickets ha ka jingiakhun semifinal kaba ar.
Ha ki jingiakhun ha ka Group B, ka Meghalaya ka la lah ban pynliem ia ka Nagaland ha ka jingiakhun kaba la shah pynthut ha u slap, hadien la pynliem ia ka Sikkim da 9 wickets ban kiew shalor jong ki kynhun.
Ha ka jingiakhun pyrshah ia ka Nagaland, u Jaskirat Singh Sachdeva u la tied 67 run bad u Arpit 57 run. Na ka liang ki nongkawang ball pat, u Ram u la ioh pynhap 3 bad ai 21 run pyrshah ia ka Sikkim, katba u Akash K Choudhary u la ioh 3/28 bad u Abhishek Kumar 2/24. U Arpit u la kamai 55 run khlem out kaba dei ruh ka half century kaba ar jong u bad u Akash u la tied 53 run khlem out.
