Nongpoh, Jymmang 14: Ki nongialam shnong na ki 7 tylli ki shnong, kiba don ha ka shatri jong Synjuk ki Rangbah Shnong Raid Sohkhwai, mynta ka sngi ki la pynlong ia ka jingialang ba kyrkieh ha Sohkhwai bad kata ka long ban pyrshah ia ka jingiaid sahuh ki trok kit khia, kiba kynthup ia ki trok kit Rnga, Dewiong, Shyiap lem bad kiwei ki kali kit khia, kiba ju pyndonkam ban iaid lyngba ka surok shnong na Umdu bad mih sha Pahammawlein 20mer.
Haba iadei bad katei ka rai ban pyrshah halor ka jingiaid ki kali kit khia lyngba katei ka surok, ki nongialam ka Synjuk ki Rangbah Shnong, kiba kynthup ia u Bah Bristar Sylliang, President ka Synjuk, nangta u Bah Shanbor Rani bad kumjuh ruh u samla Aibankitbok Sylliang, Secretary ka Seng Samla Sohkhwai, ki la ong, ba ki sngewkhia halor ka jingiaid ki trok kit khia lyngba katei ka surok, namar ka dei ka surok PMGSY kaba ym lah ban pyndonkam ban iaid da kita ki Trok ba kit khia.
Ha ka jingkren uwei hadien uwei, ki la pynpaw ruh da kaba ong, ba ka jingiaid ki kali kit khia lyngba ka surok na Umdu sha Pahammawlein 20mer, ka lah ruh ban don kaei kaei sha lyndet, namar ka dei ruh ka surok ba ki trok ki la lait ban ïaid lyngba ka Weight Bridge kaba don ha Umling.
Haba iadei bad kito ki Kali kit khia kiba ju ïaid lyngba ka surok Sohkhwai, na ka liang kitei kiba la ai jingkren, ki la ai jingmut na bynta jong kito kiba pyniaid kali, ba nangne shakhmat kim dei shuh ban ïaid lyngba ka surok Sohkhwai, hynrei ki dei ban ïaid lyngba na Umdu sha Umling, kaba dei ruh ka surok ba baroh ki trok kit khia ba ki dei ban ïaid lyngba ka Weight Bridge.
Kumta lyngba kane ka jingialang, ngi la rai ban khang pyrshah ia baroh ki kali kit khia ba ki ïaid lyngba ka surok Umdu sha Pahammawlein 20mer bad lada ngi lap ba dang don kiba leh pyrshah, ngin bat bad ngin sa aiti beit sha ki briew ka Ain, ba kin leh ia kaba donkam baroh, ki la ong.
Halor kane ka bynta, na ka liang ka Synjuk, ngi kyrpad ia ki briew ka Ain ba kin shimkhia lem na bynta ka jingmyntoi jong ki paidbah bad ba katei ka surok kan long kaba neh slem, nalorkata ngin sa leit buh jingthoh ruh sha u Deputy Commissioner ka Ri Bhoi, ba un shimkhia halor katei ka kam, kaba dei ka kam pynjot surok bad kaba ai jingmyntoi tang ia ki katto katne ngut, ki la bynrap.
Ki shnong, kibaa rai ban pyrshah halor ka jingiaid ki kali kit khia lyngba katei ka surok, ki kynthup ia ka shnong Sohkhwai, Nongtyrlaw, Umdu, Kpep Syiem, Umladoh, Umsohme bad ka shnong Umden La-ang, kiba dei ki shnong kiba hap hapoh ka Raid Sohkhwai.
