Nongpoh, Jymmang 14: Ki nongialam ka Nongpoh Region Auto Owners & Drivers Association (NRAO&DA) mynta ka sngi ki la leit syndon ban kynduh ia u MP ka Shillong parliamentary Constituency u Dr. Ricky A.J Synkong ha ka ïingsah jong u ha Nongsder, na ka bynta ban pynpaw halor shibun ki mat ki jura kiba dei na ka bynta ka jingbit jingbiang ki Dribar Auto Rickshaw  bad ruh ka jingbit jingbiang ki paidbah ha ka thaiñ Nongpoh.
Ha kane ka jingleit kynduh la ialam da u President u bah Banasar Lyngdoh Nonglait bad la synran lang ruh da ka jingdon lang u Bah F. Lyngdoh, Organizing Secretary bad kiwei ki dkot ka seng, ha kaba ha kane ka jingleit kynduh ki la aiti ruh ia ka dorkhas ban pynpaw halor shibun ki mat kiba ia dei bad ki kam jong ka Association.
Ki mat ba kham kongsan ba la pynpaw ha ka dorkhar ka long ban iada kyrpang ia ka hok ki nongniah Auto Rickshaw  kiba im jakpoh lyngba ka kam kamai ban shakri ia ki paidbah ha ka leit ka wan bad ruh halor ki kam ban pynthikna ia ka jingshakri ia ki paidbah ka dei ban long kaba ai jingshngain ia ki paidbah.
Haba kren sha ki lad pathai khubor, u Bah F. Lyngdoh Organizing Secretary, u la ong ba ka daw kaba la pynlong ia ka Association ba leit kynduh ia u MP ka Shillong, u Dr. Ricky A.J Syngkon ka long ban pynsngew halor shibun ki jingeh ki dribar Auto Rickshaw bad ka long pat kaba khubor kaba sngewkmen ba u MP u la kular ban shim khia ba kum ka seng ka kitbok kitrwiang ba un dang shaid dang khlain bad ba un dang lah ban ai ka jingshakri kaba bha tam ia ki paidbah ka jylla.
