New Delhi, Jymmang 14: Ki bor ka shipai ka Pakistan Ranger mynta ka sngi ki la pynlait noh bad aiti ia u wei u shipai BSF ka India u Purnam Kumar Shaw sha ki bor ka sorkar India hadien ba la kem ia u ne u shipai BSF ha ka 23 tarik Iaiong 2025 ha Pakistan.
Ka jingaiti ia u ne u shipai BSF mynta ka step la pynlong ha Attari-Wagah Border ha Punjab ha kaba la aiti ia u ne u shipai ka india sha ki bor ka BSF jong ka ri India ha ka por 10:30 baje eiei.
Lah ban kdew, ba u Purnam Kumar Shaw, shipai BSF ka India u la shah kem ha ki shipai ka Pakistan Ranger tang hadien ka jingjia shah hiar thma ki nongjngohkai pyrthei ha Pahalgram ha kaba 26 ngut ki briew ki la shah siat iap ha ki lehnoh jong ka Pakistan.
La ioh jingtip ruh, ba u ne u shipai BSF u la shah kem na ka International border ha Ferozepur District katba u dang ialam lynti ia ki nongrep bad da ka jingbym poi pyrkhat u la kum jam sha u pud u sam jong ka Pakistan.
Ka jingpynlait noh ia u ne u shipai BSF ka India ka la long ruh hadien ka jingiamynjur ban sangeh ia siat (ceasefire) hapdeng ka india bad Pakistan hadien ka jingiapynbeir da ki DGMOs jong kine ki ar tylli ki ri.
