Imphal, Jymmang 14: Ha ka jingjia kaba sngewsih kaba la jia ha ka step jong ka Sngi Balang, kawei ka samla pule nursing ba 21 snem ka rta na Meghalaya la lap ba ka la khlad noh hapoh ka kamra hostel jong ka ha Regional Institute of Medical Sciences (RIMS), Imphal.
Ia kane ka samla ba la khlad noh la ithuh kyrteng kum ka Abiel Sachiana Ch Marak, kaba pule B.Sc. Nursing ha ka semester kaba saw kaba shong ba sah ha ka shnong na West Garo Hills, Tura District.
Katkum ki khubor la ong, ba dei hadien ka jingbym don jong ka Abiel Sachiana Ch Marak ha ka jingkhot kyrteng kaba ju long man ka step ha katei ka jaka pule, da ka jingsngewlyngngoh, ki samla pule kiba pule lang bad ka ki leit ban wad ia ka sha ka kamra jong ka bad la lap ba katei ka samla ka la sdien phasi ialade ha ka hostel no. 2 jong ka RIMS bad kumta marmar ki la pyntip noh sha ki bor pulit.
Ka kynhun pulit na Lamphel Police Station, ryngkat bad ki ophisar na Manipur Forensic Sciences Department, ki la wan sha katei ka jaka ia ka jingtohkit bad la rah noh ia ka met jong ka la rah sha ka jaka buh metiap jong ka RIMS na ka bynta ban leh ia post mortem.
Watla na ka liang ki bor jong katei ka jaka pule bad ki pulit kim shem la lah ban batai bniah halor ka jingiap jong katei ka samla hynrei la antad ba ka la sdien phasi ialade. Ka jingtohkit ka dang iaid shakhmat ban lap ia ka jingshisha.
