New Delhi, Jymmang 15: Da ka jingtreishitom ki nongialam ka Khasi Student Union (KSU), Delhi Unit lem bad ki bor pulit ka Delhi, hynnin ka janmiet ki la ioh ban pynlait noh ia kawei samla khasi kaba la kynnoh shah ialam bakla ban poi sha nongbah Delhi ban shah pyniaid ha ki kam awria.
Katkum ka jingtip, ba la phah da ki nongialam ka KSU, Delhi Unit, la ong, ba ha ka 14 tarik Jymmang ha ka por 4 baje eiei ki la ioh ia ka phone call na kawei ka samla kaba na East Jaintia Hills District, kaba la iathuh ba ki don ki briew kiba bud ia ka bad ka sheptieng ioh ki thmu leh sniew ia ka, kumta marmar ki nongialam ka KSU ki la pyntip sha ki bor pulit ka Delhi ban leit lang sha ka jaka sah jong katei ka samla.
La iathuh ruh, ba dei hadien ka jingtohkit, katei ka samla ka la iathuh, kaba la poi sha Delhi hadien ba la shah pynbiej ha ki briew bym lah ban ithuh kiba thmu pyniaid ia ka ha ki kam awria bad haba ki pulit lem bad ka KSU ki la leit wad sha katei ka jaka sah, kitei ki briew kiba donkti tang mar ia ioh jingtip ki la phet krad noh ialade na katei ka jaka.
Ka kyrwoh ka iathuh ruh, ba ia ka mukotduma la aiti noh sha ki pulit ka Delhi ba la leit buh noh ia katei ka samla ha ka jaka kaba kham shngain bad la sdang ruh ban pyrshang pynphai noh ia kane ka samla sha la ka shnong jong ka, na ka liang ka KSU ka pynrem jur ia kum kine ki jait kam thombor ia ki kynthei bad la kyrpad ruh ia kito kiba mad kum kine ki jingjia ba kin pyntip marmar sha ki bor ka ain ban iada ia ki.
Na ka liang ka KSU ka la ai khublei kyrpang ruh ia ki bor pulit ka Delhi kiba la kloi ban ai jingiarap bad ban synranlang ha kaban leit wad ia katei ka samla bad ha kiwei kiwei ki bynta haba don ki jingjia pyrshah ia ki samla ne ki briew Khasi.
