Shillong, Jymmang 15: U Myntri Rangbah, u Conrad K. Sangma, ha ka sien kaba nyngkong eh ba u la wan ban jngoh ïa ka shnong Sanmer ha ka 14 tarik Jymmang, ha kaba u la lah ban pynurlong syndon ia ka jingkular jong u ban iarap ia ki kynhun ialehkai Kriket lyngba ki tiar ialehkai ba kongsan ha kaba la ioh ban aiti ia kitei ki ialehkai sha ki kynhun ialehkai Cricket jong ka shnong Sanmer.
Ia kine ki tiar ialehkai ba la sam da u Myntri Rangbah la aiti ha ka jingialang ba la pynbeit da ka Sanmer Sports, Social, bad Cultural Club, ha kaba la aiti ia ki tiar ialehkai sha ka kynhun kriket Sanmer, ka kynhun Kriket Sawmer, ka kynhun kriket ½, ka kynhun kriket Mawklot bad ka kynhun Kriket Umlyngka.
Lah ban kdew, ba dang shen ha ka jingiaid lynti jong u Myntri Rangbah ka jylla ban leit trekking, u la iohi ia ki katto katne ngut ki samla ialehkai kriket jong ka Sanmer kiba dang ialehkai kriket da ka mynsiem ialehkai kaba shlur bad jingangnud ban kiew ha kane ka kam ialehkai, ha kaba u Myntri Rangbah u la hiar ban lehkai kriket lang bad ban iakynduh ruh ia ki rangialehkai ha katei ka sngi ban tip shaphang ki jingdonkam jong ki bad u la kular ban ai ka jingkyrshan jong u da ki tiar ialehkai ia kaba u la pynurlong.
Haba kren ha ka jingialang, u Myntri Rangbah u la ban jur halor ka jingdonkam ban kdup ïa ki samla bad ban ai ha ki ïa ki lad ban kiew shaphrang ha ki jingïalehkai bad ka put ka tem.
“Ym don kano kano kaba ai jinghun shuh ia nga ban ïohi ïa ka jingangnud bad jingthrang jong ki samla jong ngi ban kiew ha ki sap kaba ki don, la ka dei ka kam ialehkai ne ka kam rwai,” u la ong, da kaba kdew ïa ka jingkut jingmut jong ka sorkar ban thaw ki lad ki lynti na ka bynta ka jingkiew shaphrang jong ki.
U la pynbna ruh ïa ki katto katne ki sienjam ba kongsan na ka bynta ka imlang sahlang jong ka Sanmer kiba kynthup ban pynioh ïa ka PA system, ka jingïarap pisa na ka bynta ka Sanmer Sports and Cultural Club, bad ka jingkular ban kyrshan ïa ka jingtei ïa ka community hall bad ka jaka pynlang um.
