Manipur, Jymmang 15: Ki bor ka tnat pule Nursing jong ka Regional Institute of Medical Science (RIMS) Imphal ha ryngkat ki khynnah pule nursing, mynta ka 15 Jymmang 2025, ki la ioh ban leh burom khatduh ia ka met kaba sah jong ka samla pule nurse ka (L) Abiel Sachiana Ch Marak kaba la khlad noh ha ka step jong ka Sngi Ba-ar ha ka hostel ba ka sah jong ka, hashwa ba ia ka met yn rah noh da ki bahaiing sha West Garo Hills, Tura da ka aeroplane Indigo na Imphal sha Guwahati.
Kumba pynkynmaw, ka samla (L) Abiel Sachiana Ch Marak na West Garo Hills District (Tura) ka dei ka samla ba dang pule ia ka 4th Semester Bsc Nursing ha ka jaka pule jong ka RIMS, Imphal ha kaba la lap ba ka la sdien phasi ialade ha ka kamra jong ka hostel no. 2 jong katei ka jaka pule.
Watla, ki pulit ki dang pynlong ia ka jingtohkit halor katei ka jingjia sdien phasi jong kane ka samla pule nurse kaba na ka jylla Meghalaya, hynrei ia ka met la aiti noh sha ki bahaiing ban pyndep pat ia ka jingleh niam kaba khatduh.
Hashwa ban rah noh ia ka met jong kane ka samla sha ka shnong ba ka sah, na ka liang ki bor ka tnad pule jong RIMS kynthup naduh u Director lem bad kiwei kiwei ki heh jong katei ka tnad pule nurse bad ki para samla pule nurse ki la leh burom khatduh ia ka met jong katei ka samla hashwa ban rah noh da ka aeroplane Indigo na Imphal sha Guwahati bad ban pynpoi pat sha ka shnong ba kane ka samla ka shong ka sah na bynta ka jingleh burom ba khatduh.
