Nongpoh, Jymmang 15: Kum shi bynta na ka jingrakhe ïa ka World No Tobacco Day ban ïalap sha ki paidbah na ka jingma jong ka jingdih duma ne bam duma, ka Alpha English Higher Secondary School Nongpoh mynta ka sngi 15 tarik Jymmang ka la pynlong da ka jingïaid paidbah kaba la sdang na skul Alpha sha sor Nongpoh bad pynkut biang ha phyllaw jong ka skul na ka bynta ban ïalap halor ka jingktah jong ka jingdih duma ne bam duma.
Ha Shuwa ban pynlong ïa ka jingïaid paidbah ki bor pynïaid skul ki la pynlong shuwa ïa ka prokram ai jinghikai sha ki khynnah skul halor ka jingma jong ka jingdih duma bad bam duma, ba la ai jingkren da ki nonghikai bad ki Khynnah Skul bad hadien kata ki la bteng da kaba ïaid paidbah ban rah la ki placard, ki banner bad ryngkat ki jingthoh kiba pyrshah bad pynsngew sha ki paidbah ba u duma u dei uwei na u jingdih ba sniew kaba ktah ïa ka koit ka khiah.
Na ka liang ki khynnah skul, haba ïaid paidbah ha ka surokbah ha Nongpoh ki la pyrta shla lyngba ki jingtoh bapher bapher bad khamtam ka kyntien ba ngim dei ban dih ne bam duma, naba kane ka ktah shisha ïa ka koit ka khiah jong u briew ha ki bynta bapher bapher jong ka met.
Haba ai jingkren ha kane ka sngi, ka kong W.K Blah Principal jong katei ka skul, ka la ong ba ki bor pynïaid ka skul ki la pynlong ïa kane ka jingïaid paidbah ka long ban ïalap pyrshah halor ka jingma jong ka jingktah u duma bad kum ki bor pynïaid skul ki la pynsgewthuh sha ki khynnah skul bad kumjuh ruh sha ki paidbah kaba long ruh shi bynta ka jingrakhe ïa ka World No Tobacco Day.
Ka la kren ruh ba ka jingdih duma ne bam duma ka ktah shisha ïa ka koit ka khiah jong ki briew bad dei namar kane ka daw kum ka skul ka ïalap pyrshah ïa u duma bad da kaba kyntu ruh ïa ki khynnah ba kim dei ban ktah ïa u duma ne kiwei kiwei ki jingdih kiba sniew namar kane ka ktah ïa ki ym tang ha ka koit ka khiah bad kumjuh ruh ha ki liang baroh.
