Nongpoh, 08 Jylliew: Ka ophis treikam jong u District Sports Officer (DSO) na East Khasi Hills bad na Ri Bhoi ruh kumjuh, ki la pynbna paidbah ba ka lympung ialehkai phutbol ki khynnah na ki skul bapher bapher bad kaba la tip kum ka District Level Inter School Football Tournament ba mynta u snem, kan sa sdang noh shen mynta u bnai.
Ha ka jingiakhun hapdeng ki skul ha EKH, yn sa sdang ha ka 10 tarik mynta u Bnai, ha kaba yn pynialehkai ha Madan heh Mini Stadium kaba don ha Mawlai Phudmuri bad ha madan Third Ground jong ka MFA kaba don ha Polo.
Ha EKH ki kynhun na ki skul kiba la wan ban iashimbynta ha ka Subroto Cup ba mynta u snem, ki long ha ka U-15 ki don 12 tylli ia kaba yn pynialehkai ha madan Heh, katba ha ka U-17 ha ki kynthei ki don 5 tylli ki skul kiba wan iashimbynta bad ha ka U-17 ki shynrang ki don 14 tylli ki kynhun ia kaba yn pynialehkai ia ki ha Third Ground Polo.
Kaba kum katei kajuh hi ka lympung ialehkai, ha Ri Bhoi yn sdang ha ka 11 tarik mynta u Bnai, ha kaba yn pynialehkai ha artylli ki madan, kata ha madam Nongjri bad Madan Umran Niangbyrnai.
Lah ruh ban kdew hangne, ba ki kynhun kiba rah na la District Level kin sa iakhun sa ha ka State Level bad kano kano kaba ioh ban rah na ka State Leven, kan sa mih ban mihkhmat na ka jylla bad iakhun bad kiwei pat ki skul na kylleng ki jaka ha ka ri, kaba kin sa ialehkai ha Nongbah Delhi.
SHEN YN SDANG KA DISTRICT LEVEL INTER SCHOOL SUBROTO CUP HA EKH BAD RI BHOI
