Nongpoh, Jymmang 17: Ka kynhun jong ki Shipai ba la shongthait, kiba don ha ka kynhun kaba la tip kum ka Hynniew Trep Meghalaya Ex-Services League, mynta ka sngi ki la ïoh ban pynthymmai ba pynskhem ia ki nongkitkam ka Ri Bhoi Unit jong katei ka kynhun ki Shipai ba la shongthait, kata ka long na bynta ka samoi treikam jong u snem 2025 haduh u 2028.
Ia katei ka jingialang pynskhem ia ki nongialam jong ka kynhun ki Shipai ba la shongthait, la pynlong ha Auditorium Hall ha Marngar, ha kaba nalor ka jingdon ki Shipai ba la shongthait, la sakhi ruh da ka jingdon ki Tnga jong kito ki Shipai ba la khlad bad kiba haiing ruh kumjuh.
Ia ki nongkitkam ba thymmai jong ka Hynniew Trep Meghalaya Ex-Services League, Ri Bhoi Unit, la wan ban pynskhem da u President Bah S. Syiemlieh, bad u Bah B. Marchyang, kiba dei ki nongialam ka Hynniew Trep Meghalaya Ex-Services League, Central Body.
Lyngba jong katei ka sngi ba la jied bad pynthymmai ia ki nongkitkam ka Hynniew Trep Meghalaya Ex-Services League, Ri Bhoi Unit, ba la jied ia u Bah S. Thangkhiew, kum u President bad u Bah Niren Pambah, kum u General Secretary lem bad kiwei pat ki nongkitkam bahakhmat jong katei ka kynhun.
Haba kren sha katei ka sngi, ba la pynskhem ia ki nongkitkam ka Ri Bhoi Unit, ki nongialam ka Hynniew Trep Meghalaya Ex-Services League, ki la ong ba ka jingpynkha ia ki Unit ha manla ki Distrik kiba don hapoh ka Bri u Hynniewtrep, ka long ban pynkhlain ïa ka rukom treikam ha ka Central Body jong ka kynhun, namar kum ka kynhun jong ki Shipai ba la shongthait, ka don ka jingthmu ban ïarap bad pynioh ia baroh ki jingmyntoi ba kum ki Shipai ba la shongthait ki dei ban ïoh, kata kaba kynthup naduh ia kito kiba kynduh jingeh hadien ba khlad noh u Shipai, nangta don ruh ki khep ba ka jingmyntoi ka dei ban poi sha ki khun lem bad kiwei.
Ki nongialam jong katei ka kynhun, ki la pynshai ruh ia kito ki Shipai ba la shongthait halor ki jingmyntoi ba ki dei ban ïoh, ha kaba naduh ba pension, ka bai skul, ka jingmyntoi ba ki khun kynthei ki ïoh haba ki iathoh shong kurim lem bad kiwei.
