Jowai, Jymmang 16: Kawei na ka kynhun seng na Ri-lum Jaintia, ka Jaintia Students’ Union (JSU) Jowai Circle ka la mih shakhmat ban pyrshah ia kawei na tamasa ka put ka tem (Music Festival) ba la thmu ban pynong ha ka jaka ba don syndah bad ka Civil Hospital Ialong ha West Jaintia Hills District, kaba la rai ban pynlong ha 23 tarik u Jymmang 2025.
Kane ka seng ka la pynpaw, ba kane ka jingpynlong ia ka tamasa jong ka put ka tem hajan ka jaka ai jingsumar ka dei ka jingpynkhein ia ka Noise Pollution (Regulation and Control) Rules, 2000 bad ruh hapoh ka Environment Protection Act, 1986, kaba ktah ia ki paidbah khatam ia nongpang kiba shah sumar ha katei ka jaka ai jingsumar.
Kumba la pynpaw da ka seng, hadien ka jingiakynduh ia u Additional Deputy Commissioner ka West Jaiñtia Hills District, la ong ba kim tip ei ei shaphang kane ka tamasa ka put ka tem bad kim don jingtip satia la ki la ioh jingbit neem na ki bor synshar District. Kane kan ktah lada bun ki briew kiba tuid sha kane ka tamsa khlem da ioh jingbit na ki bor ba dei peit.
Ban pynlong kum kine ki jaid tamasa ban pyndonkam da ki kor jingsawa kiba khlain hajan ka jaka ai jingsumar kan ktah ia ki nongpang kiba shah sumar bad kan wan rah ruh ka jingdheng kali kaba jur, kaba lah ruh ban ktah ia ka iaid ka ieng ki Kali Ambulance kiba donkam kyrkieh ha ka pang ka shitom ban ioh jingsumar, pynpaw kane ka seng.
Namarkata, na ka liang kane ka seng ka pynrem jur ia ka tnad Tourism kaba don bynta ban pynlong lang ia kane ka tamasa jong ka put ka tem khlem da pyrkhat ia ka jingshah ktah kiba pang ba shitom bad ha kawei ka bynta ka seng ka la kyrpad da ki bor ba dei peit naduh ki rangbah shnong bad ki bor sorkar ba dei peit ba kin pynkynriah noh ia ka jaka sha kawei ka jaka khnang ba kan nym ktah ia kiba pang ba shitom kiba sah sumar ha katei ka jaka ai jingsumar ka sorkar, pynpaw ka seng JSU.
