Yupia, Jymmang 19: Ka kynhun ialehkai phutbol U-19 jong ka India, ka la ioh ban rah ia ka namlahduh ha ka South Asian Football Federation (SAFF) U-19 Football Championship 2025 bad kata ka dei hadien ba ka la lah ban pynliem noh ia ka kynhun ialehkai ka Bangladesh da 4-3, ha ka jingiakhun kaba la poi sha ka jingiashut Tie Breaker.
Ia katei ka jingiakhun phainal hapdeng ka India bad Bangladesh, ka la long ha Golden Jubilee Stadium jong ka jylla Arunachal Pradesh, ha kaba lyngba jong katei ka jingiakhun phainal hapdeng kitei ki ar-kynhun, ka la pyndap hi smam ia ka Stadium da ki nongkyrshan jong ka India.
Haba phai sha katei ka jingiakhun phainal, ka India ka la ioh ban pynkhihjar tang ha ka minit ba 2 jong ka jingiakhun, ha kaba la thep da u Singamayum Shami bad uba la thep ha ka dur jong ka Free Kick bad haduh ba kut ka kylla step, ka India ka tam da 1-0.
Haba bteng ka kylla miet jong ka jingiakhun, ka jingiakhun ka la nangitynnad bad shongshit eh, namar ki rangialehkai ka Bangladesh, ki la iakhun dohiap na bynta ban ioh pynphai ia katei ka kol kaba ki la shah thep bad kumta ha kaba kum katei ka jingiakhun, ka Bangladesh kaba la ioh ban pynphai ia katei ka shikol lyngba u Md Joy Ahamed, uba la thep ha ka minit ba 61 jong ka jingiakhun bad ka jingiakhun phainal hapdeng kitei ki kynhun, ka la kut ha ka jingiakhaid haduh ba kut ki 90 minit.
Na bynta ban rai ia ka namjop bad namrem, ki nongpyniaid ha katei ka jingiakhun, ki la rah noh sha ka jingiashut Tie Breaker bad dei ha ka Tie Breaker, ba ka India ka la lah ban pynliem noh ia ka Bangladesh da 4-3 bad long syndon kum ka lahduh ha ka SAFF U-19 Football Championship 2025.
Kum ban shu kdew hangne, ba ha ka SAFF) U-19 Football Championship 2025 ki don hynriew tylli ki ri kiba la wan ban iashimbynta, kita ki kynthup ia ka India, Nepal, Sri Lanka, Bangladesh Maldives bad Bhutan
