Shillong, Jymmang 19: Kum u Myntri rangbah ka jylla, u Conrad K. Sangma mynta ka sngi u la leit ban jurip ia ka jinglong jingman ka ïewduh ha Shillong, kaba dei kawei na ka iew kaba heh tam ha jylla kaba la pynim jakpoh da ki lak ngut ki longïing kiba im jakpoh na kane ka iew.
Ha ka jingleit jurip la synran lang ruh da u Symbut Myntri ka jylla, u Bah Prestone Tysnong, ki ophisar na ka Tnat Urban, Municipal, PHE bad kiwei kiwei kiwei ki tnad treikam sorkar.
Kumba la sakhi ha kane ka jingleit jurip, u Myntri Rangbah ka jylla, u Conrad K. Sangma, u la shah slap ia lade ha kaba la sakhi ba ka khlieh jong u ka la jhieh wat la u la pyndonkam ia ka jacket iada slap.
Haba kren sha ki lad pathai khubor, u Myntri rangbah ka jylla, u la iathuh ba ka daw kaba la pynlong ia u ban jurip ia kane ka iewduh, ka long ban peit ia ka jinglong jingman bad ban pynbha ia kane ka iew ha kaba ka sorkar ka la dep ban mang T. 6 klur bad mynta kan sa mang sa T. 15 klur ban pynitynad ia kane ka iew, kaba dei kawei na ka iew ba la rim tam ha ka jylla.
U la ong ruh ba ka sorkar ka shim khia ban pynbha ne pynitynad ia kane ka iew, ha kaba kan buh da kata ka ‘master plan’ ban pynbha lut ia baroh ki jingduna kiba don hapoh kane iew bad kawei na ka thong ka long ban kyrshan ruh ia ki nongshong iew kiba la kot da ki lak ngut kiba la im jakpoh da ka jingdon kane ka iew kaba la paw nam bha ha ka jylla.
Shuh shuh, u la pynpaw ruh ka jingkmen ba ha kane ka jingleit jurip, kum u myntri rangbah ka jylla, u la ioh ban ia kynduh ia ki nongshong dukan, ki nongrep, ha kaba la ioh ruh ban ia twad jingmut ban tip ia ka jingeh ka jongki, kane ka jingjurip ka long shi bynta ban thaw dur thymmai kane ka iew kaba pynsahnam ia ka jylla bad ruh ban kyrshan da ki lak ngut ki nongshong shnong kiba la im japoh da ka jingdon kane ka iew.
