Nongpoh, Jymmang 19: Ka Nongpoh Town Committee (NTC) lyngba u Chairman u Bah S.F Lyngdoh bad u Secretary u Bah Rayonald Kharkamni, ki la ai ka jingkhublei kaba kyrpang ia ka sorkar jylla, ha kaba ha ka jingialam u Myntri Rangbah ka jylla, u Conrad K. Sangma ki la wan poi shibun ki kam pynroi lyngba ka tnad urban Affairs.
Na ka liang u Chairman u Bah S.F Lyngdoh bad u Secretary u Bah Rayonald Kharkamni, ki la ong ba ka Nongpoh Town ka dei kawei na ka sor rit ha ka jylla, kaba dang donkam shibun ki kam pynroi ban kyntiew bad ban pynphyrnai ia kane ka sor ha Nongpoh bad dei lyngba ka jingiarap na ka sorkar jylla lyngba ka tnad Urban Affair ki la wan poi shibun ki kam pynroi sha ki Shnong bah hap ha ka Nongpoh Town ha Ri Bhoi District.
Ki la ong ruh kum ka Nongpoh Town ka hap ban ai khublei kyrpang ia ka sorkar bad ruh ia ka tnad Urban Affair, namar ha ki snem ka Nongpoh Town ka ioh duna bha ki kam pynroi, hynrei dei lyngba kane ka sorkar MDA ki la wan shibun ki kam pynroi kiba la ai jingmyntoi ban dang pynbha bad pynphuh pynphieng ia sor Nongpoh.
Ki la iathuh ruh tang ha u snem 2023-2024, ka Nongpoh Town Committee ka la ioh pdiang ia ka song pisa kaba T. 1.45 klur kaba dei lyngba ka ID Scheme ban pyntrei ia ki kam pynroi hapoh ki 11 tylli ki shnong ba hap ha ka Nongpoh Town bad kaba kham ai jingmyntoi shuh shuh ia ki shnong hapoh ka Nongpoh Town ka dei na ka bynta jong u snem 2024-2025 ba ka sorkar jylla lyngba ka tnad Urbar Affairs lyngba ka ID Scheme ka la mang biang haduh T. 6 klur tam ban dang pynphuh pynphieng lyngba ki kam pynroi bapher bapher hapoh ka Nongpoh Town.
Namarkata, na ka liang ka Nongpoh Town Committee ka ai khublei kyrpang ia ka sorkar jylla bad kynthup ruh ia u Myntri Rangbah ka jylla u Conrad K. Sangma bad kumjuh ruh u Myntri ka tnad Urban Affairs bad ka tnad Urban Affairs, ha kaba dei lyngba ka jingiatrei lang ki wan ki kam pynroi hapoh ka sor Nongpoh, ki la bynrap.
