Nongpoh, Jymmang 20: Na ka daw ka jingbteng ka jingther u lapbah kaba la neh naduh hynnin ka miet bad haduh mynta ka step, ka skul, ki ing ki sem bad ki lynti ki synkien ki la shah ktah jur na ka jingshlei um ha ka Shnong Umpher, Byrnihat ha Ri Bhoi District.
Na ka daw ka jingther u lapbah ka St. Jude Higher Secondary School, Byrnihat, ki ing ki sem bad ki lynti ki syngkien ki la shah ktha jur ha kaba ka um ka la rung wat sha ki kamra klas bad sha ki ing ki sem.
Kane ka jingjia ka dei kaba la ju jia man la u snem tang shu poi ka aiom lyiur ba jur slap, ha kaba mynta ka sngi, katei ka skul pule ka la hap ban ai shuti ia ki khynnah skul, ba ka um ka la rung shaduh ki kamram klas bad ki phyllaw jong ka skul. Nalor kata ki ing ki sem ruh bun kiba la shah ktah ba ka um ka la rung sha ki ing ki sem.
Kumba ju pynpaw, kane ka jingjia shlei um ka ju jia na ka por sha ka por tang shu jur u slap bad ka daw kaba ki ju pynpaw, ka dei hi na ka jingbym biang ka Nala um jong ka surokbah National Highway-6 ha Ri Bhoi District.
Kum ban pynkynmaw, u MLA ka Jirang Constituency u Bah Sosthenes Sohtun ha u snem ba la dep u la ai ruh ki lad jingiarap sha katei ka skul bad ban iarap ruh ban pynkhuid ia ka nala um, hynrei mynta u snem kane ka jingjia ka jia biang kumjuh ha kaba ka la buh jingeh ia ki bor pyniaid skul bad ruh ia ka shnong ba ka jingshlei um ka jia beit ha kane ka shnong.
