Jowai, Jymmang 21: Ka long ka sngi kaba dap da ka jingkmen na bynta ki paidbah nongshong shnong ka Mookaswan hapoh ka West Jaintia Hills District, ha kaba mynta ka sngi u Myntri Rangbah ka jylla u Conrad K Sangma u la ioh ban plie paidbah noh ia u surok ba paka ia kaba la jer kyrteng kum ka Hubert Rosario Road hapoh Spein, Mookaswan, West Jaintia Hills.
Ka jingtei ia u ne u surok u ba don ka jingjrong kumba 1.13 km la pynmang ha ka jinglut kaba la kot kumba. 1.93 crore, kaba dei ka surok kaba pyniasoh sha ka Hubert Acupressure Centre.
Haba kren ha kane ka sngi hadien ka jingplie ia kane ka surok, u Myntri Rangbah u Conrad K. Sangma u la ong, ba ka jingkordor jong kano kano ka kam pynroi kam shong tang ha ka dor, hynrei ka shong ha ka jingpynmyntoi ia kiba bun hapoh ka imlang ka sahlang.
“Kane ka surok kaba la tei ka lah ban kot ka jinglut sha ka 1.93 crore katkum ka jingpynmang, hynrei ha nga kam shong eh ha ka dor ba la mang ia ka, namar ka jingpynmang ia ki kam pynroi ka dei ban pynmyntoi ia kito kiba donkam, khamtam kito kiba la angnud la slem, kiba pang ki shitom, kito kiba thrang ia ka jingkoit jingkhiah bad ki sisters kiba treishitom ban ai ka jingshakri ban pynkoit ia kiba pang”, ong u Myntri Rangbah.
Kum u Myntri Rangbah ka jylla Meghalaya, u la pharia ruh halor shibun ki kam pynroi ba la mang da ka sorkar jylla, da kaba kdew ba tang kumba 659 crore tyngka la mang na bynta ban tei ia ki surok naduh ki snem 1991 bad 2018, hynrei la palat 4,000 crore la pynmang da kane ka sorkar tang hapoh ki Hynñiew snem bad kumba 70% na ki jingtei jong ki surok lyngba ka Pradhan Mantri Gram Sadak Yojana (PMGSY) la lah ban pyndep lut hapoh kine ki snem.
U la kdew ruh, ba ka jylla Meghalaya ka dei ka jylla kaba la lamkhmat bha na ka jingpynmang pisa ha kaba ia dei ka ka Koit ka Khiah da ka tam kumba 8% na ka jingpynmang pisa ha ka shisnem bad kumba 1,000 crore la mang na bynta ka tnat ka Koit ka Khiah ha kaba ka sorkar jylla ka la kyrshan lang ia ki jaka sumar ba pyniaid da ka sorkar kumjuh ruh da ki kynhun treimon sngewbha, ki kynhun Balang bad kiwei kiwei, da kaba bynrap ruh ba ha ka wat kaban sa bteng ka jaka ai jingsumar jong Hubert Acupressure Centre kan sa shah kynthup lang ban ioh ia ka jingpynmang pisa na bynta ban kyntiew ia ka jaka sumar.
Ha kane ka sngi ba la plie ia kane ka surok, la ia donlang ruh da u Symbut Myntri Rangbah ka jylla u Bah Sniawbhalang Dhar, u Archbishop Victor Lyngdoh na ka Shillong Diocese, u Bishop Ferdinand Dkhar na ka Jowai Diocese, u MLA ka Jowai u Bah Wailadmiki Shylla, ki ophisar na ka tnat Public Works Department, ki riew rangbah nalor kiwei kiwei ki riew pawkhmat.
