Shillong, Jymmang 21: Ka Dorbar Shnong ka shnong Nongspung mynta ka sngi ka 21 tarik Jymmang ka la kyrpad ïa ka sorkar jylla ban ai jingiarap ne pynmang song pisa na ka bynta ban pynneh pynsah bad pynitynnat ïa ka Mawsangri, kaba long ka jaka kaba pawnam bha na ka bynta ka jingitynnat mariang, kaba la pynlong ruh kum kawei na ki jaka jngohkai pyrthei ha ka jylla.
Ia kane ka dorkhas na ka liang ka Dorbar Shnong ka la aiti ha u Myntri ba dei khmieh ia ka tnad Jngohkai pyrthei u Bah Paul Lyngdoh ia kaba la aiti da ka kynhun jong ka Dorbar Shnong ba lamkhmat da u Acting Sordar, u Johnworthborn Kharmyndai.
Na ka liang u Bah Kharmyndai, u la kdew ba ha ka dorkhas, la buh ia ka jingkyrpad sha ka sorkar ba kan phaikhmat lem na bynta katei ka thain da kaba ai jingiarap ban pynmang pisa na ka bynta ki jingtrei pynshna ïa ki lynti syngkien kum ka jingtei ïa ka surok shaduh kliar lum ban pynsuk ïa ki nongwan jngohkai pyrthei bad ki trai shnong kumjuh, ki lynti ïaid, ki dak lynti bad ki jaka peit, ka jingtei ïa ka pung ha u lum, ban thaw ïa ka jaka peit kaba lah ban ïohi ïa ki thaiñ Mawkyrwat bad ki thaiñ Mairang nalor kiwei kiwei.
U la ong ruh, ba katkum ka puriskam jong ki trai shnong, ïa ka Mawsangri la ngeit ba ka dei ka kmie jong u Kyllang bad u Symper, kiba dei arngut ki riewtymmen kiba pawnam ha ka jinglong tynrai jong ka kolshor jong ngi, ha kaba kane ka puriskam la ïoh pateng na ki longdien, bad ngi ngeit ba ka jingpynneh pynsah bad ka jingpynbha ïa kane ka jingdonkam ban pynbna ruh ia ka kolshor ka lah ban khring ïa ki nongwan jngohkai pyrthei bad pynmyntoi ïa ki paidbah.
“Ngi ngeit ba da ka jingpynroi bad jingpynneh pynsah kaba paka, ka Mawsangri ka lah ban long ka jaka jngohkai pyrthei kaba pawnam, kaba pynroi ïa ka kolshor bad ka ïoh ka kot na ka bynta ki paidbah,” u la ong.
