Shillong, Jymmang 22: Ka Sorkar jylla Meghalaya mynta ka sngi ka la kyntu jur ia ki bor sokar ka Assam ban pynkhlaiñ ia ka jingtei ia ki nala pyntuid um ha ha ki surokbah bad ym ban shu kynnoh ia ka jylla Meghalaya ha kaba ia dei bad ka jingshlei um kaba khah khah ha sor Guwahati.
Ia kane la pynpaw da u Bah Kyrmen Shylla, Myntri ba dei peit ia ka tnad Disaster Management ka jylla, haba jubab halor ka jingkynnoh u Himanta Biswas Sharma, Myntri Rangbah ka jylla Assam ba ka jingshlei um ha sor bah Guwahati ka dei namar ka jingjur ka jingtih khyndew bad ki jingtei bapher bapher ha ki jaka khappud ka jylla Meghalaya.
“Ki dei ban wad ia ka daw balei ba jur ka jingshlei um khah khah bad ba ki dei ban wad lad kumno ban tei pynbit pynbiang ia ki nala pyntuid um ha ka jaka ban shu kynnoh laplah ia ka jylla Meghalaya”, ong u Bah Kyrmen Shylla, da kaba bynrap ba ka jingshlei um ha sorbah Guwahati kam dei kaba dang shu jia shen hynrei kaba la kham slem bha.
U Bah Shylla u la pynshai ruh, ba ki bor ka sorkar jylla Meghalaya kam pat ioh satia kano kano ka jingthoh kaba paka halor katei ka jingkynnoh jong ka sorkar Assam, ba ka daw halor ka jingshlei um sha sor Guwahati ka dei na ka daw ki jingtih khyndew bad jingtei jong ka Meghalaya.
Halor katei ka daw jong ka jingshlei um khah khah ha sor Guwahati, u Bah Shylla u la ai jingmut ba ka sorkar Assam ka dei ban pynlong ia ka jingsorjamin (Survey) kaba tikna ban lap shisha ia ka daw bah hashwa ban kynnoh khlem tip ia ka jingshisha, u la bynrap ruh, ba lada ka um ka tuid na Meghalaya kane ka dei kaba ju long namar ba ka jylla ka dei ka jylla kaba ioh bha ia u slap.
Shuh shuh ruh, u la ong ba ka jylla Meghalaya ka long kaba kloi ban ia treilang ban wad ia ki lad kumno ban weng ia ki jingeh halor ka jingshlei um ha ka jaka ban shu kynnoh khlem ki sakhi satar ban pynshisha.
