SHILLONG, Jymmang 22: U Bah Kyrmen Shylla kum uwei na u Myntri ha ka kynhun ki Myntri sorkar ha ka jylla, ha ka sngi Balang u la ong ba ka sorkar jylla kan sa bishar bniah halor ka jingdawa na kabynta ban pynlong ia ka Jowai kum kata ka ‘Summer capital’ ha West Jaintia Hills District.
“ Ka sorkar ka hap ban peit ia ka jinglong jingman halor kane ka jingdawa bad kam dei kaba suk ban pynurlong ia kane ka jingdawa” ong u Bah Kyrmen Shylla sha ki Nongthoh Khubor.
Kum uwei na u Nongmihkhmat paidbah na Jaintia Hills, u Bah Shylla u la ong, “ Lada ka sorkar ka lah ban pdiang ia kane ka jingdawa ban pynlong ia ka Jowai kum kata ka ‘Summer Capital’, kan nym don kano kano kaba ktah halor kane ka jingdawa”.
U la ong ruh ban pynkylla kum kata ka ‘Winter ne Summer Capital, kan wan rah ia kiba bun ki jinglut jingsep ba ka sorkar jylla ka hap ban pynlut pisa.
Shuh shuh, u Bah Shylla u la ong ruh, “ Ki paidbah ki don ka hok ban dawa bad ka sorkar kan pyrshang ban pyrulong katkum ka jingkotbor bad kam dei pat ka kam kaba suk ban pynlong tang ha ki khyndiat por. Ka jingdawa ne ka jingbuh jingtyrwa, ka sorkar ka pdiang, hynrei kam long pat kaba suk ban pynurlong kynsan bad ka por kan sa batai” u la bynrap.
