Nongpoh, Jymmang 24: Ka Dorbar Shnong Nongthymmai Raid Madan Kyrdem mynta kasngi Saitjain ka la pynkup burom ïa u Samla Evanshan Nongrum Uba la wan rah ïaka nam ka burom ïaka shnong bad ïaka District hi baroh kawei lyngba ka jinglah jong u ban trei shitom ha ka kam pule puthi haduh ban da kynjoh shaduh ka kyrdan ka ba ar napdeng ki 20 ngut lane ka top 20 haka result SSLC kaba la pynmih da ka MBOSE mynta u snem.
Katei ka jingpynkup burom daka dorbar shnong ïa utei u samla ka long kum ka dak ban pynpaw ïaka jingkmen bad ka jingsngew sarong ban don ïa u samla uba la lah ban kynjoh shaduh katei ka kyrdan haka pule ka puthi bad ha kajuh kapor ban ai mynsiem ruh ia kiwei ki samla ba kin trei shitom ha ka jing pule jong ki.
U Samla Evanshan Nongrum, U dei u khun jong ka kong Rose Mary Nongrum Bad u Bah Wallking Lamare ba naka shnong Nongthymmai Raid Madan Kyrdem, Ribhoi District bad utei u samla u ialeh ïaka exam matrik naka skul Sacred Heart Boys’ Higher Secondary School, Shillong haka result ba la pynmih daka MBOSE ha ka 5 tarik Ïaïong 2025 jong ka klas pule SSLC utei u samla u la wan baar hapoh ka thup top 20.
Ha katei ka sngi pyndonburom ïa utei u samla la wan ban sakhi lang da u Bah Cornelius Laloo u nongthoh khubor ka jylla bad uba dei ruh u samla rangbah jong katei ka shnong hakaba la sakhi lang ruh da u Bah Rishan Nongpluh kum u samla ka rangbah ka shnong,u Pherlus Mawroh Rangbah shnong, Kong Jerissina Muktieh President Seng Longkmie, Tbn. H Kharsaiñ bad Tbn. H Kharsohnoh lem ki khun samla ka shnong bad ki Longkmie ki longkpa.
Haba kren ha kane ka sngi, naduh u Bah Cornelius Laloo bad u Bah Rishan Nongpluh kum ki samla rangbah na kane ka shnong, ki la ai ka jingiaroh ia u samla Evanshan Nongrum, uba la wan rah ia ka nam bad ka burom ia ka ïing ka sem bad ia ka shnong ka thaw. Kine baroh ki al urlong ban poi sha katei ka jingjop sha ka kyrdan ba hakhamt eh ha ka SSLC examination ka dei hi tang ka jingtrei shitom, ki la pynpaw.
Ki la buh ruh ka jingkyntu kynpham ia u samla Evanshan Nongrum ba un dang trei shitom ha ki jingpule haduh ban da poi sha kata ka thong bad ha kajuh ka por ruh ki la kyntu naduh ki Longkmie ki longkpa, ki samla ba kin kiar na ka jingsarong, ka jingbishni pihuin bad ka jingiakren sniew ba kine ki lam sha ka jingjot bad dei tang lyngba ka jingiatrei lang na baroh ki liang ngi lah ban pynmih shibun ki khlur ba phyrnai na kane ka shnonng kaba long ka jingsarong ia shnong bad ka dong ka thain hi baroh kawei, ki la bynrap.
