Nongpoh, Jymmang 23: “Ka Ain POCSO ka bud ia phi nadien nadien ban pynshitom ia phi” ong ka Dr. Dr. Saphronia Mawñiuh, kaba dei ka Lecturer bad ka Nongsaitaiñ haba ai jingkren ban pynshai halor kane ka aiñ ba la tip kum ka Protection of Children From Sexual Offence, 2012 haba kren ha kawei na ka prokram ai jinghikai ka seng, ‘The Tulba Legend Biker’s Association (TULBA) kaba la lam khmat ban pynlong ia kane ka prokram ban ai jinghikai halor ka jingma u drok bad ruh ban tip shaphang kane ka Ain POCSO ba la pynlong mynta ka sngi ha ha ka Hall jong ka Umroi Presbyteian Higher Secondary School, Umroi.
Ha kane ka prokram la wan ban shim bynta da u Bah Kyrmen Uriah, uwei na Nongthoh Khubor ka jylla kum u kongsan bad la sakhi lang ruh da ka jingdon lang ka Dr. Saphronia Mawñiuh kaba dei ka Lecturer bad ka Nongsaitaiñ, u Bah KC Lywait, OC ka Umïam Police Station, u Bah TP Tmung, Principal ka Umroi Presbyterian Hr. Sec. School, u Bah Samuel Kurbah President ka TULBA Eastern Zone lem bad kiwei kiwei ki riew rangbah bad ki nongialam Shnong nalor ki nonghikai bad ki khynnah skul.
Ha kane ka prorkam, nalor kitei ki kongsan kiba la ai jingkren bad pynshai halor ka jingktah jong ki jingdih ba pynbuaid kum u duma bad u Drok, ka Dr. Dr. Saphronia Mawñiuh ka la kham ban khia halor ka ain POCSO, 2012, kaba dei kawei na ka aiñ ba ki paidbah ki hap ban tip bad kane ka ain kan teh kan khum lada thombor pyrshah ia ki kynthei kiba hapoh ka 18 snem bad kaba dei ruh ka ain kaba ai jingiada kyrpang ia ki kynthei kiba dang rit ka rta kum ka jingshah thombor ia ka long kynthei jong ki.
Na ka laing ka Dr. Dr. Dr. Saphronia Mawñiuh, ka la kren shai ba ngim dei ba ialehkai bad ka ain POCSO, namar kane ka ain ka bud nadien nadien lada ngi thom bor ia ki kynthei ki khynnah kiba hapoh ka rta kaba 18 snem shapoh.
Shuh shuh, ka la pynshai ruh ba ka sorkar India ka la pyntreikam ia ka ain IPC ban ai jingiada ia ki kynthei ki khynnah bad namar ka jingjur ka jingshah thombor ki kynthei ki khynnah, ka sorkar India ka la pyntreikam noh ia kane ka ain Protection of Children From Sexual Offence, 2012 ha ka 14 tarik u Naiwieng 2012, kaba dei kata ka ain kaba ai jingiada ia ka jingshah thombor ki kynthei ki khynnah kiba dang rit ka rta.
Kum ka nongai jingpynshai ha kane ka prokram, ka la ban khia ba ngi dei ban husiar ban lait na ka jingshah teh shah khum ha kane ka ain, namar ka ain POCSO kan nym map iano iano ruh wat lada don ka jingmynjur ki kmie ki kpa lada don ka jingshongkha ha ka rta kaba ym pat kot sha ka 18 snem shaneng bad kino kino kiba don kti la ka dei ka kam shongkha ne ka kam shah thombor kin shah pynshitom beit ha kane ka ain, ka la pynshai.
Ha kane ka sngi, naduh u kongsan u Bah Kyrmen Uriah bad kiwei kiwei ki nongkren ruh ki la kren halor ka phang ka jingktah ki jingdih ba sniew naduh u duma bad u drok bad ban lait na ki jingma kitei ki jingdih ba sniew ngi dei ban hikai ia la ki khun ba kin tip ia kaba sniew bad kaba bha.
