Ziro, Jymmang 31: Ha ka jingjia twa khyndew kaba shyrkhei kaba la jia hajan ka jaka rep kubi bad hajan kawei ka dukan sha ha Pine Grove, arngut ki briew ki la iap bad kane ka jingjia ka la jia ha miet jong ka 30 tarik Jymmang ha ka por 10:30 PM bad 11:00 PM.

Kine kiba la khlad ha ka jingjia twa khyndew, ki dei kiba na Lakhimpur Assam kiba dang trei ha ka dukan ja bad ka jingtwa jong ka khyndew ka dei namar ka jingther u lapbah khlem sangeh ha katei ka thain, pyntikna u DySP Ojing Lego, ha kaba la pyntip ba ka ka met la dep ban sei bad aiti noh sha ki bahaiing.

Ia ka met jong kitei kiba la shah tap ha ka khyndew la lah ban sei noh marmar da ka jingiatreilang da ki bor ka State Disaster Response Force (SDRF), Indo-Tibetan Border Police (ITBP), bad ki paidbah nongshong shnong.

Dang ha kine ki khyndiat sngi, namar ka jingiai bteng ka jinghap slap ha Arunachal Pradesh, la iathuh ba ki la don 7 ngut kiba la khlad bad 9 ngut kiba la mynsaw kiba kynthup ha ki jingjia ha Bana, East Kameng district, bad sa ar ngut ha Ziro, Lower Subansiri District.