Shillong Jymmang 31: Ka la long shisha ka khubor kaba pynkyndit bad pyndum ia ka buit ka stad jong ka party United Democratic Party (UDP), hadien ba u nongialam ba la rim tam u Dr. Jemino Mawthoh u la rai ban pynlait san shyieng noh da kaba resaiñ ialade na kane ka party.

Lah ban kdew, ba u Dr. Jemino Mawthoh u dei u wei na ki nongialam bad rishot ba khlaiñ ka party UDP bad u ba la jop ruh kum u MLA na Nongthymmai Assembly Constituency ha u snem 2013 bad u ba bat ruh ia ka kyrdan kum u General Secretary kumba 10 snem eiei hynrei kane ka jingmih jong u na ka party ka la pynkyndit ia baroh ki nongialam.

Ka party UDP ka dei kawei na ki party riewlum kaba la rim tam ha ka jylla Meghalaya bad ka dei ruh ka party ka don bun ngut ki MLA, Ar ngut kiba bat ia ka kyrdan Myntri ha ka sorkar MDA-II ba lamkhmat da ka party National People’s Party (NPP).

Watla, ia ka daw ba balei u Dr. Jemino Mawthoh u la shim ban resaiñ noh na ka party UDP kam pat da shai bha hynrei la pyntikna pat ba ia ka shithi resaiñ la aiti ha u President ka party.

Na ka liang, u Dr. Jemino Mawthoh um pat pynpaw ia ka rai ban pyniasoh sha kano pat ka party saiñ pyrthei, hynrei la bna wurwer ba ka la don ka jingtyrwa ia u ban pyniasoh sha ka party NPP, BJP bad VPP.