Nongpoh, Jylliew 09: U Symbut myntri ka sorkar jylla u Bah Prestone Tynsong haba kren sha ki lad pathai khubor ka jylla mynta ka sngi, u la pynpaw ba ka sorkar jylla ka sngew ktah shisha halor ki ki jingkyntoh ha ki lad pathai khubor na rithor, ba la kynnoh ba “ka jylla Meghalaya ka dei ka ktem jong ki kam sniew” kaba dei halor ka jingshah pyniap u Raja Raghuvanshi hajan Wei Sawdong ha Sohra bad kane ka jingkynnoh ka long kaba ym don nongrim satia.
U Bah Prestone Tynsong u la ong ruh halor ka jingjia na kitei ki shi kurim kiba wan kai Honeymoon Sha Meghalaya ba kynthup ia u Raja Raghuvanshi bad ka Sonam Raghuvanshi sha Sohra, ka sorkar bad kynthup ruh naduh ki bor pulit, ki SDRF bad NDRF kim shym la shong kli kti bad ki la shim khia ban wad haduh ba la lap ia ka met iap u Raja Raghuavanshi ha ka 2 tarik u Jylliew 2025 bad ki Lad pathai khubor pat na rithor khlem da bishar bniah ki la shu kynthoh klumar kaba long ka jingjah burom ia ka jylla Meghalaya.
U la iathuh ba hadien ka jingtrei shitom jong ka jingtohkit bniah kaba kynthup ia ka jingiatrei lang ki pulit na kiwei ki jylla, ki Pulit ka Meghalaya, ryngkat ka jingiarap na ki Pulit ka Uttar Pradesh bad Madhya Pradesh, ki la ioh kem ia ki saw ngut ki briew kiba kynthup ia u Akash Rajput (19) na Lalitpur, Uttar Pradesh; u Vishal Singh Chauhan (22) na Indore, Madhya Pradesh; u Raj Singh Kushwaha (21) na ka jaka ka bym shym la pynpaw; bad u Anand Kurmi (23) na ka shnong Batahari, ha ka district Satna, Madhya Pradeshm bad ka Sonam ka la wan pyndem hi ia lade ban shah kem noh ha ki Pulit ka Uttar Pradesh.
Shuh shuh, ka Sonam Raghuvanshi ka la leit aiti ialade ha Nanganj Police Station ha ka district Ghazipur, Uttar Pradesh. Mynta ka don hapdeng ka jingshngain bad ak jingtohkit ki pulit ka Uttar Pradesh. La iathuh ruh ba ia kitei ki ba don kti pyniap ia u Raja Raghuvanshi kynthup ia ka Sonam kin sa wan rah sha ka jylla Meghalaya na ka bynta ka jingtohkit kaba bniah.
U la bynrap ruh ba kane ka jingkynnoh ba ka Jylla Meghalaya ka dei ka ktem ki kam sniew, ka la ktah ym tang ia ka sorkar jylla bad ka la ktah ruh ia ka jingmut jingpyrkhat kiba paidbah ka jylla.
