Ha kawei ka jingjia kawei ka nongpang ha Civil Hospital Nongpoh kala phlei snam haduh ba ka jingthiah bad ka madan kala lyngkien da ka snam hynnin ka step tang namar ka jingtorti jong ki nurse kiba don duty ha katei ka por bad kiba khlem patiaw wat hadien ba ka nongap kala pyntip sha ki bunsien.
Kane ka jingjia kala jia haka por 3 duna eiei mynstep, ha kaba ka nongap kaba dei ruh ka para jong katei ka nongpang kala iohi ïaka jinglyngkien ka snam bad mar mar kala pyntip sha ki nurse ba don duty ha katei ka por, hynrei kaba sngew lyngngoh ka long ba ki nurse kim shym la patiaw eiei.
Naka liang ka nongap pang kala ïathuh ruh hadien ba kala pyntip sha ki Nurse kam don kano kano ka jingshimkhia naka liang jong ki bad kim shym la sngap bad ai ñia pynban ba kam dei ban leh khyllung haba kala don ha jaka sumar.
Kaba sngew lyngngoh ka long ba wat ka jaiñ siang thiah kim shym la shimkhia ban kylliang wat hapdeng ka jingkhah jong ka snam hynrei hadien bun kynta bala poi da ki dkhot ka RBYF hadien bala don ka jingujor bad naka liang ka seng kala lap ruh ba ka jingbuh ïa u pipe ban ai drip ka long na shilliang jingthiah sha kawei ka kti kaba don sha kawei pat ka liang.
Halor katei ka jingjia naka liang ka RBYF Nongpoh Circle hapoh ka jingïalam u Alberto Nongsiej kum u President, mynta ka sngi da ka jingbitar kala leit ban ïakynduh syndon ïa ka Medical Superintendent ka Civil Hospital Nongpoh ban ujor halor katei ka jingjia bad ba dei ban shimkhia mardor ban pynlong ka jingtohkit bad ban leh da kaba tyngeh ïaki nurse kiba don duty ha katei ka por namar ki jingleh torti ha katei ka jaka sumar kam dei shuh kaba thymmai hynrei kaba la ju jia naka por shaka por.
PHLEI SNAM KA NONGPANG HA CIVIL HOSPITAL BA LAIT U PIPE DRIP, KHLEM PATIAW KI NURSE
