Shillong, Naitung 01: Da ka jingsngewbitar kaba jur halor ka jingshah pynibor ha ki bor ka tnad Shillong Municipal Board kiba la kyndang naphang ia ki nongdie madan ha ka thaiñ Khyndai Lad kaba la sdang naduh ka 30 tarik Jylliew, mynta ka sngi, ka 1 tarik Naitung ki nongdie madan da ki spah ngut ki la tur sha Secretariat ban dawa ia la ka hok.
Ha kane ka jingmih ki nongdie madan ban tur sha Secretariat, la sakhi ia ka jingthoh pyrshah jong ki ia ka Certification of Vending kaba long pyrshah ia ka hok trai ri trai muluk ha kaba la dawa ruh ban pynurlong ia ki mat jingdawa ba la buh da ka kynhun jong ki nongdie madan.
Lah ban kdew, ba ka tnad SMB lem ki bor district ka East Khasi Hills District, ki pulit ki la kyndang naphang ia ki nongdie madan ki bym don ia ki CoV katba ia kito kiba don ia ka CoV la ailad ban weng noh ia ki jingdie jong ki hapoh ka 22 tarik Naitung.
Ha kane ka jingleit tur sha Secretariat, ki nongdie madan ki la pynpaw ia ka jingpyrshah kaba jur ban pynkynriah ia ki sha ka jaka ka bym biang bad kaba lah ban wanrah ia ka jingduhnong kaba khraw ia ki.
