Nongpoh, Naitung 02: Na ka daw ka jingdon ki kynrum ki kynram hapoh ka Elaka Nongpoh Sirdarship, u Deputy Secretary ka Khasi Hills Autonomous District Council, u Bah A. Basaïawmoit mynta ka sngi u la shimti noh kum u Administrator ban peit ïa ka synshar ka khaddar na ka bynta ka 3 bnai katba ym pat lah ban pynbeit ïa ka kam sirdar hapoh kane ka Elaka Nongpoh Sirdarship ha Ri Bhoi District.
Kane ka jingshim rai ka KHADC ban thung noh da u Administrator ban peit ïa kane ka Elaka Nongpoh Sirdarship, ka dei hadien ba la don ki nongïalam Raid kiba la ujor sha ka High Court pyrshah ïa u Bah Wanphrang Syiemnongshai kum u Sirdar ka Elaka Nongpoh Sirdarship bad na ka liang ka High Court ka la pynmih ïa ka hukum ba hapoh ka 3 bnai dei ban buh da ka Referendum, khnang ban lah ban pynbeit ïa ki kynrum ki kynram hapoh kane ka Elaka Nongpoh Sirdarship.
Haba kren sha ki lad pathai khubor, u Bah A. Basaïawmoit kum u Deputy Secretary ka KHADC bad uba la shah thung kum u Administrator, u la ong ba u la wan ban shimti mynta ka sngi kum u Administrator kane ka Hima, ka dei hadien ba ha u snem 2024 la sospon ïa u Sirdar kane ka Hima halor ka jingujor na ki khlieh nongsynhar sha ka bishar ba don burom ka High Court.
Ha kane ka sngi, hadien ba la shimti u Bah A. Basaïawmoit kum u Administrator ka Hima, la thung ruh ïa u Bah Lui Star Lyngdoh kum u Secretary ba shipor jong ka Hima lem bad ki 10 ngut ki dkot na ki khlieh nongsynshar ka Hima bad ki Raid.
