Shillong, Naitung 07: Ha kawei ka jingjia kaba sngewsang khait, Uwei u panah u bym don shuh ka mynsiem jingiatip lem u la batbor ïala ka jong ka khunruit ba dang 15 snem ka rta haduh ba kan da armet.
Katei ka jingjia, ka la jia ha kawei na ki shnong ha East Khasi Hills District, ha kaba ka jingpynshisha halor ka jingshah batbor haduh ba katei ka khynnah ka la armet da ki Doctor, ha ka por ba la leit ban phah peit ia ka koit ka khiah jong katei ka khynnah ha ki jaka sumar sorkar.
Ka kmie jong katei ka khynnah, ka la iathuh ba ha kaba nyngkong ka la iohi ba ka khun jong ka, ka la ipher ha ka rukom long jong ka khun jong ka, kumta haba ka la rah sha jaka sumar, la lap pynban ba ka la armet la 6 bnai, kata ka dei hadien ba ka la shah batbor ha la u jong u Panah.
Ka kmie jong katei ka lanot, kam shym la don jingtip eiei ruh em halor katei ka jingshah lehbor ia la ka jong ka khun, hynrei ki jingshisha baroh ki la paw pyrthei tad haduh ba la poi sha jaka sumar, ha kaba katei ka khynnah ka la phla ha la ka jong ka kmie ba ka la shah batbor ha la u jong u Panah.
Halor katei ka jingshah batbor haduh ban da armet ka khun, ka kmie jong katei ka lanot, ka la kyntu ia ki bor ka ain ba kin shimkhia bad ban pynngat ha ki kyndon ain kiba tyngeh pyrshah ia utei u Panah runar, uba la batbor bad pynarmet ia la ka jong ka khun-ruid.
