Mairang, Naitung 7: Da ki hajar ngut ki paidbah mynta ka sngi ki la iaid paidbah bad pynlong ruh ia ka jingialang ban dawa jur na ki bor ka ain ba dei ban pynshitom ia u runar ba pyniap ia ka samla Phynailin Kharsyntiew, 27 snem ka rta bad ruh ki la dawa jur ba dei ban ai ia ka jingbishar kaba hok ia katei ka samla kaba la duh noh ia la ka jingim tang na ka daw ka jingshah ot ryndang ha utei u runar ba la tip kyrteng kum u Roberto Marngar 25 snem.
Kum ba pynkynmaw, kane ka jingjia kaba sngewsih ka la jia ha ka 30 tarik u Jylliew 2025 ha kaba u Roberto Marngar u la ot ia ka ryndang ka Samla Phynailin Kharsyntiew ha ka jaka pynieng Kali ha ka shnong Pyndengumiong, haduh ba ka la duh syndon ia laka jingim da ki kam runar utei riew thrang snam.
Ban pynrem jur halor kane ka jingjia, da ki hajar ki paidbah naduh ki samla, ki longkmie, ki longkpa, ki khynnah skul, ki nonghikai, ki nongialam seng bhalang bad ki nongialam shnong ryngkat ki nongmihkhmat paidbah mynta ka sngi ki la mih madan ban iaid paidbah bad ban pynlong ia ka jingialang paidbah na ka bynta ban pynrem jur halor kane ka jingjia bad ban dawa ia ka hok jong katei ka samla kaba la duh noh ia la ka jingim tang na ka daw utei u riew thrang snam uba la iap ka jingtip lem kum u briew.
Kane ka jingiaid paidbah ka la sdang na jan ophis Horticulture Mairang bad iaid lyngba ka ophis Block ter ter sha iew Mairang bad la pynkut ha Madan Dom Mawlum, ha kaba ki sur pynrem bapher bapher ki la mih ba dei ban pynshitom ia utei u runar bad ruh ka jingdawa ba dei ban ai ka jingbishar kaba hok ia katei ka samla.
