Nongpoh, Naitung 08: 2 tylli ki Auto Rickshaw bala set ha jaka set haka shnong Mawtnum, Ri-Bhoi District kila shah thang dusmon haki runar bym lah satia ban ithuh haduh ba kawei ka auto kala ingkhong khaid katba kawei pat kala shu kemding malu mala.
Katei ka jingjia kala jia haka por kumba 1 baje eiei mynstep ha kaba katei ka auto kaba la ingkhong khaid kaba don ïa u number ML 10 D 0651 ka dei jong u Bah Roboatson Marweiñ, katba kawei pat kaba la julor malu mala kaba dei kaba don ïa u number ML 10 D 3492 jong u Bah Xavier Thabah kiba dei ki auto bala set lang haka juh ka jaka.
Naka liang u Bah Roboatson Marweiñ u trai jong katei ka auto u la pynthikna ba kane ka dei ka kam dusmon bala leh da ki runar ki bym don shuh ka jingpyrkhat nalor ba katei ka auto ka dei kaba u kamai man ka sngi ban pyndap ïaka iing ka sem bala shu shim da ka ram kaba ym pat siew dep, hynrei ka long kaba sngewsih kthang ba ki runar kila shu dusmon ban thang da ka ding haduh ba kan da ingkhong khaid.
Halor katei ka jingjia naka liang u Bah Ricky Lyngdoh President ka kynhun ki nongñiah auto jong ka Saiden Unit u la pynrem jur ïa ki runar ba donkti ha katei ka kam bad kyrpad ruh ïaki bor ka aiñ ban pynlong ka jingtohkit ba bñiah ban lapdien ïa ki runar ba donkti ha katei ka kam.
