Ka kynhun ialehkai phutbol ki shynrang ka India, ka la hiar kynsan hi jrain na ka kyrdan ba 127 sha ka kyrdan ba 133 ha ka pyrthei hi baroh kawei, kata katkum ka FIFA ranking jong u bnai Naitung, ia kaba la pyllait da ka FIFA ha kine ki khyndiat sngi.
Ka jinghiar kynsan ka kynhun ialehkai phutbol ka India shaduh katei ka kyrdan, lehse ka dei na ka jingrem ha ki ar-tylli ki jingiakhun kiba dang shu dep ha kine ki bnai ba la dep, ha kaba ka India ka la rem da 2-0 hakhmat ka Thailand ha ka jingiakhun International Friendly bad nalorkata sa ka namrem kaba 1-0 hakhmat ka Hong Kong ha ka jingiakhun jong ka Asian Cup qualifying round.
Ia ka kynhun ialehkai ka India, la ialam da u Manolo Marquez’s, u Coach na ri Spain bad hapoh ka jingialam jong u kum u Coach, na ki saw sien ki jingiakhun pyrshah ia kiwei ki ri, ka India jop shisien kata pyrshah ia ka Maldives, kaba dei ruh ka jingiakhun ha Nongbah Shillong, ba ka India ka la thep da 3-0.
Nangta sa ka jingiakhaid pyrshah ia ka Bangladesh ha ka jingiakhun ha Nongbah Shillong, kaba dei ka jingiakhun jong ka AFC Asian Cup Qualifiers, ha kaba ka jingiakhun ka la kut ha ka jingiakhaid kaba ym don kiba pynkhih jar.
Katba ki jingiakhun shabar na ka ri, kiba kynthup pyrshah ia ka Thailand, ka India ka la shah rem da 2-0, kumjuh ha ka jingiakhun pyrshah ia ka Hong Kong, ha kaba ka India ka la shah rem noh da 1-0.
Ki jingiakhun ba bud na bynta ka India kin long pyrshah ia ka Singapore bad Bangladesh ha ka AFC Asian Cup Qualifiers.
