Shillong, Naitung 14: Ka Federation of Khasi Jaintia and Garo People (FKJGP) ka la khang khyrdep ia ka General Post Office (GPO) kaba don ha Shillong bad ia ka Post Office kaba don ha 7 Mer Upper Shillong.
Kane ka jingshah khang ki ophis kadei namar ka jingburom iaka sngi shuti kaba dei ka sngi lehniam Beh Deinkhlam jong ki paid rilum Jaintia.
Ka seng FKJGP haka jingialam da ki nongialam ba kynthup u samla Arkinfield Khonglam, Bantei Nongkhlaw bad Donkupar Nongdhar president Pomlum unit ki la shimkhia ban leit khang ia kine ki ophis hadien bala ioh jingtip ba kim burom ia ka jingpynbna shuti da ka sorkar Jylla.
Ka FKJGP ka la dawa na ka Sorkar Jylla bad sorkar pdeng ban pynmih ia ki jingbthah ban pynthikna ba ki tnat bapher bapher kin burom ia kum kine ki sngi shuti.
Ka FKJGP ka la maham ruh ba kan leh da kaba tyngeh ïa kino kino ki ophis ki bym burom ïa ka sngi ïap jong u nongialeh laitluid ka Ri Khasi U Tirot Sing Syiem, kaban sa wan ha ka 17 tarik u Naitung.
