Nongpoh, Naitung 17: Ban pynpaw ia ka jingkynmaw burom ia ka lyngkhuh sngi iap ba 190 u Syiem Tirot Sing, ki kynhun sengbhalang ha Ri Bhoi, kiba kynthup ia ka KSU bad FKJGP, mynta ka sngi ki la leit buh syntiew ki skud ha u Mot sahkynmaw u Syiem Tirot Sing, uba don ha phyllaw ka skul Jawahar Navodaya Vidyalaya (JNV) Niangbari.
Haba katei ka sngi, shwa ban leit buh syntiew ha u mot sah jingkynmaw jong u Syiem Tirot Sing Syiem, kitei ki nongialam seng, ki la pynlong shwa ia ka jingialang hajan u Mot, ia kaba la sakhi da ka jingdon ki nonghikai ka JNV Niangbari bad ki khynnah skul kiba pule hapoh katei ka skul.
Haba ai jingkren ha katei ka sngi, ki nongialam ka KSU bad FKJGP, ki la pynpaw ba kum ka jaidbynriew ka dang donkam ia shibun samla ki ba don ia ka mynsiem shynrang bad ka mynsiem len lade kumba long u Syiem Tirot Sing, na ka bynta ka dawbah jong ka jaidbynriew ki ban mih shakhmat ban shakri ia ka imlang ka sahlang.
Nalor ka jingkren na ki nongialam seng, la ïoh ruh ka jingkren na ki nonghikai jong ka skul JNV Niangbari, ha kaba ki la ai ka jingiaroh ia ka jinglen lade jong u Tirot Sing Syiem, u nongialeh laitluid ym tang na bynta ka Ri Khasi, hynrei wat na bynta ka Ri India hi baroh kawei, uba la nud ban ialeh pyrshah ia ki Dohlieh bad kiba la biang ia ki tiar ki tar ialeh ha kito ki por.
