Shillong, Naitung 16: U Nongialam ka UDP uba dei ruh u Myntri Sorkar u Bah Kyrmen Shylla hynne ka sngi u la ong ba ka jingjyllei u drok hapoh ka jylla kadei ka mat kaba baroh ki nongmihkhmat jong ka Jylla ki sngewkhia namar u drok u la pynjot ïa bun ngut ki samla.
Haba kren sha ki lad pathai khubor, u Bah Kyrmen Shylla u la ong ba ka mat halor u Drok kadei kaba sngewkhia ym tang ha ka jylla wat ha ka ri bad ka pyrthei baroh kawei.
“Ngi la ïohi ba bunsien ki samla ki la long ka jingma jong une u drok ha kaba u drok u pyrshang ban wad ïa ki lad ki lynti ban ïakhun pyrshah bad ban poi sha ki samla ka jylla jong ngi bad nangta ban pynjot ïa ka kamai kajih” la ong u Bah Kyrmen.
Haba pynpaw ka jingdonkam ban iatreilang ba ratdkhong ia u Drok, u Bah Kyrmen u la ong “Kane kadei ka mat ha kaba ym tang ka jingsngewkhia jong uwei u briew hynrei baroh ki sngewkhia bad tad haduh ba baroh ki ïawan lang ban kyrshan bad snohkti lang yn lah ban pynduhjait ia u Drok hynrei kan long ka kam kaba eh bha ban ïakhun pyrshah ïa u drok, lada iakhun marwei”.
“Nga kwah ruh ban ai khublei kyrpang bad sngewnguh ia ki Dorbar Shnong jong ki shnong bapher bapher, nga la iohi na ka por sha ka por ba ki kyrshan shisha bad ki pyrshang ban wad ki lad ki lynti kumno ban iarap ia ki khun ki kti jong ngi, ki samla jong ngi ba kin ym ngop ha u drok” u la ong.
