Nongpoh, Naitung 18: Ha ka jingïalang kaba la long dang shen ha Nongpoh ba la lamkhmat da u Dr. Ricky A.J Syngkon kum u Chairman, ki la pynlong ïa ka jingïashong pyrkhat bad ki ophisar ka Ri Bhoi District na ka bynta ban ïa kren ne ïa thir sani halor ki skhim ka sorkar kmie kiba bapher bapher ba la tip ruh kum ka District Development Coordination and Monitoring Committee (DISHA), kaba dei ka Committee ba hap ha khlieh da u MP ka Shillong Parliamentary Constituency.
Ïa kane ka jingïalang la pynlong ha Conference Hall ka ophis u Deputy Commissioner ka Ri Bhoi District bad la sakhi lang ruh da ka jingdon lang u MLA ka Nongpoh, u Bah Mayral Born Syiem, u MLA ka Mawhati u Bah Charles Marngar, u MLA ka Umsning u Dr. Celestine Lyngdoh, u Nominated MDC ka KHADC u Bah Mathew Makdoh, u Deputy Commissioner ka Ri Bhoi u Abhilash Baranwal, u Project Director ka DRDA u Raja Brahma bad kiwei kiwei ki ophisar na ki Block bad ka District.
Kumba la pynpaw, ka jingthmu jong kane ka jingïalang ka long ban pynthikna ba ki skhim sorkar kmie ki dei ban pyntreikam kumba la mang da ka sorkar, ban pyntreikam hok ha ka rukom kaba khuid bad ruh ba ki paidbah ki dei ban ioh ka jingmyntoi lyngba ki skhim ka sorkar kmie ba la mang ha kane ka District.
