Nongpoh, Jylliew 11: Ka Kong Bindas Syiem na ka thain Umden, Ri Bhoi District kaba la mih shakhmat ban pynpaw ia ka jingsngewkhia kaba jur halor ka jingbym urlong ki jingkular ban ai surok ba paka na Nongpoh-Umden-Sonapur (NUS) kaba la rai ban iakhih da kaba shah thngan khlem pud sngi, mynta ka sngi kane ka longkmie ka la rai ban weng noh ia ka jingshah thngan jong ka hadien ba la iaid 5 sngi hadien ba ka sorkar MDA jong ka jylla Meghalaya ka la kular biang ban pynurlong noh ia ka jingdonkam ia u surok NUS.
Lah ban kdew, ba ka Kong Bindas Syiem, ka la mih shakhmat ban pynlong da ka jingiakhih ban shah thngan khlem pud ia kaba la pynlong hapoh ka phyllaw jong ka jaka ieng kali ka Additional Secretary ha Nongbah Shillong, ha kaba kum ka longkmie ka la ieng satar ban dawa pynurlong noh ia ka jingshna thymmai u surok NUS u ba la jot rathai mynta da ki phew snem bad buh jingeh shikatdei ia ka leit ka wan ka kit ka bah jong ki paidbah kynthup naduh kito kiba pang ba shitom bad wat ia ki khynnah skul.
Ka Kong Bindas ka la sdang ia kane ka jingiakhih ban shah thngan khlem pud sngi naduh ka 6 tarik Jylliew 2024 ban pynbor ia ka sorkar jylla ban pynurlong noh ia ka jingdonkam u paidbah na ki phew tylli ki shnong kiba iaid ba ieng lyngba u surok NUS. Ia kane ka jingiakhih jong ka Kong Bindas la ioh ruh ia ka jingkyrshan ba radbah na ki sengbhalang bapher bapher ka jylla ba kynthup ka KSU, North Khasi Hills District, ka HITO, HYC, Seng Samla Umden, ka Synjuk ki Rangbah Shnong bad kiwei kiwei.
Ha ka 11 tarik u Jylliew, ka Kong Bindas kaba la iaid shakhmat ban shah thngan khlem pud kata haduh 5 sngi, ka la shah khot ban ia kren bad ki bor ka sorkar jylla ha ka jingialam da u Bah Prestone Tynsong, kum u Symbut Myntri Rangbah ka Jylla, u ba la kyrpad ia ka Kong Bindas ban weng noh ia ka jingiakhih jong ka, kata halor ka jingkular ba ka sorkar ka la pynmang ia ka skhim jong ka sorkar pdeng ban tei ia u surok Umden ban pyniasoh sha u surok bah NH-06 ha Byrnihat lyngba ka DoNER bad PMGSY scheme wat III, ha ka jingmang pisa kaban kot kumba 100 Klur Tyngka.
Na ka liang ka Kong Bindas Syiem, hadien ba la ioh ia ka jingkular kaba tikna bad ba paka na ka sorkar MDA jong ka jylla Meghalaya ka la pynpaw ia ka jingsngewhun bad ruh ban weng noh ia ka jingiakhih shah thngan jong ka da ka jingkyrmen ba ka Sorkar Jylla ha kane ka kynti kan nym kylla ktien shuh kumba la jia ha ki snem ba la leit noh.
Ka Kong Bindas ka la ai khublei kyrpang ia baroh ki kynhun kiba la ai jingkyrshan bad ai mynsiem ia ka ha kine ki 5 sngi ba la leit noh ha ka jingiakhih shah thngan khlem pud jong ia kaba mynta ka jingthmu jong kane ka jingiakhih la kyrmen ba kan urlong noh shen.
YN MANG KA SORKAR MEGHALAYA 100 KLUR BAN TEI IA U SUROK UMDEN, WENG JINGIAKHIH KA KONG BINDAS SYIEM
