Ka Federation of Khasi Jaiñtia and Garo People (FKJGP) Central Body hadien ba la iohi ia ka jing shimkhia jong ka sorkar ka jylla Assam ban khynra naphang ia ki suba mynder (Eviction drive against the illegal immigrants) ha kylleng ki jaka ban pynher krad noh shisyndon ia ki sha ka jaka ba ki wan, kala pynsngewkhia jingmut shi katdei eh ia ka seng hi baroh kawei ioh ba lehse kitei ki mynder kiba la shah beh krad na ka jylla Assam kin poi pynban sha ka Jylla Meghalaya namar kadei ka jylla kaba iatyngkhuh bad kiba bun ki khappud la ka long ha Ri-Bhoi District, West Khasi Hills, Jaiñtia Hills bad Garo Hills ruh kumjuh. Ka jing bym don satia ia ki aiñ kiba khlaiñ ban iada na ka jing wanrung kyrthep jong ki mynder kan buh iaka jaitbynriew bad ia ka jylla hi baroh kawei ha ka jingma kaba khraw.
Ka jing bym shimkhia jong ka sorkar jylla Meghalaya wat ban pyntreikam pura ia ki aiñ kiba la don lypa kum ka Inter-State Migrant Workmen (Regulation of Employment and Conditions of Service) Act, 1979 (Work Permit) ka dei ka aiñ kaba la dep ban pynjur bad pyntreikam naduh ka 28 tarik Naitung 2011, ka Meghalaya Residents Safety & Security Act 2016 bad kumjuh ruh ia ka Meghalaya Identification, Registration (safety & Security) of Migrant Workers Act 2020, ka pynpaw shaikdar ba ka sorkar jylla kam don mon satia ban iada iaka jaitbynriew bad kila kheiñ dewthala ia kata ka khet ba ki bat ia u lakam synshar bad kata ka sur bala mynjur ha Assemby ha u bnai Nohprah 2019 ban kyntu ia ka sorkar pdeng ban pyntreikam ia ka Inner Line Permit (ILP) kadei tang ka jing pynthame iaki kynhun sengbhalang bad ia ki paidbah nong shong shnong jong ka jylla hi baroh kawei.
Katei ka jingleh drama jong ka Sorkar MDA ba la lamkhmat da ka Party NPP mynta la ar samoi (Two Terms) kala paw pyrthei hadien jong ka jingkren jong uwei na ki myntri khynnah jong ka sorkar pdeng uba bat ia ka tnad Cooperation u Krishan Pal Gurjar uba dang shu wan shen sha ka Jylla Meghalaya dang ha kine ki khyndiat sngi ha kaba u la pynpaw ba um don jingtip ei ei ruh em iaka jingkwah ban pyntreikam iaka Inner Line Permit (ILP) ha ka jylla Meghalaya.
Ka jing pyrshang ban shu tap eit miaw da ka sorkar jylla ha ka kyrteng ban shna Aiñ thymmai bad kumjuh ruh ban pynthame ba yn leh Amendment biang iaka MRSSA 2016, kadei tang ka buit arsap suda. Ka FKJGP ka sngew ba wat ka Jylla Nagaland kaba la don lypa Ia ka Inner Line Permit (ILP) ruh ka dang sheptieng ioh ba lehse kita ki ki mynder kiba la shah beh krad na ka jylla Assam kin poi pynban sha ka Jylla Nagaland tad haduh ba ka sorkar jong ka Jylla Nagaland kala pynmih syndon da ka jingpynbna ha ka 21 tarik Naitung 2025 ban bthah ia baroh ki Deputy Commissioner jong ki District bapher bapher ban long kiba peitngor bad ban pyrkhing shuh shuh ia ka jing wan jong ki briew kiba nabar, sa katno tam lei lei iaka jylla Meghalaya ha kaba ka sorkar kaba ialam ia ka jylla ka dang iohthiah lyngngai bad ki bym don jing kitkhlieh satia ia ka lawei jong ka Jylla bad kaba shu bunkam pynban tang ha ki kam tamasa.
Ka FKJGP ka sngew ba lada ka sorkar ka dang iai pyrshang ban ialam bakla ia ki paidbah tang namar ka jing kwah ban ailad bad ban iada iaki mynder kiba wan rung kyrthep sha kane ka jylla ka jong ngi na ka bynta ka jing myntoi ha ka saiñ pyrthei ban pynlong Vote Bank da ki mynder na ka bynta ban skhem ka shuki lajong, khlem pep kan sa poi ka ia ba ka ding kan sa klang bad ha kata ka por ka sorkar kam dei ban tei pop iaki kynhun Seng Bhalang.
Ka FKJGP ka buh ka jing kylli hato kita ki Infiltration Check Gate kin shu long tang ki khyrdop lum khajna jongno re jongno bad kita ki Labour Inspectors ba la thung ha man la ki Block kin shu pyn syrwa kai iaka pisa jong ka sorkar da kaba shu shim tulop ei khlem da treikam satia. Ka Sorkar jylla kala dei ban shimkhia mardor bad kam dei satia ban dang kheiñ sting halor katei ka bynta bad lada ka sorkar jylla kam pyni satia kino kino ki dak ki shin na ka liang jong ka FKJGP kan sa leh la ka jong ka bynta.
Kyntang iawai ka FKJGP ka bthah ia baroh ki shnat treikam jong ka seng kiba don ha ka jylla hi baroh kawei ba ki dei ban long kiba peitngor bad ban bteng biang ia ka jing khynra mynder khnang ba kan long ka jingiada ia ka jaitbynriew na ka jing shah tyllep bad na ka bynta ka jing shngaiñ ki pateng ki ban sa wan, kane ka long katkum ka kyrwoh na u Samla Kitboklang Nongphlang, Vice President FKJGP Central Body.
